Zhibek Zholy туристік пойызы жобасының кезекті кезеңі наурыз айына жоспарлануда

Жобаның кезекті кезеңін іске асыру 2026 жылғы 20–25 наурыз аралығына жоспарланған. Сапар Ұлы Жібек жолының тарихи бағытымен өтіп, Алматы – Түркістан – Самарқанд – Душанбе – Ташкент – Алматы қалаларын қамтиды, – деп хабарлайды Aikyn.kz.

Жоба өңірдің негізгі тарихи-мәдени және рухани орталықтарымен танысуды көздейді, сондай-ақ мемлекетаралық туристік ынтымақтастықты дамытуға және тұрақты трансшекаралық туристік маршруттарды қалыптастыруға бағытталған.

Маршрут аясында қатысушылар түркі әлемінің рухани ордасы – Түркістан қаласына, ислам өркениетінің маңызды тарихи орталықтарының бірі – Самарқандқа, бай мәдени мұрасы бар астана – Душанбе қаласына, сондай-ақ өңірдегі ірі әкімшілік әрі туристік орталық саналатын Ташкентке сапар шегеді. Бағдарламада экскурсиялық қызмет көрсету, тарихи-мәдени мұра нысандарын аралау және маршрутқа қатысушы елдердің дәстүрлерін танытатын мәдени іс-шаралар өткізу қарастырылған.

Жоба Қазақстан Республикасы Туризм және спорт министрлігінің, «Қазақстан Темір Жолы» АҚ-ның және «Қазақстандық туризм индустриясы» республикалық қауымдастығының қолдауымен жүзеге асырылуда.