Жиырма бір мың жас сапқа тұрды

Олардың ішінде 11 мыңнан астамы Қарулы күштердің қатарында мерзімді әскери қызметін өтейтін болса, 7 мыңнан астамы – ІІМ Ұлттық ұланына, 2 мыңға жуығы – Ұлттық қауіпсіздік комитетінің Шекара қызметіне, 400-ге тарта жас – Төтенше жағдайлар министрлігіне, ал 300 азамат  Мемлекеттік күзет қызметіне жіберілді.

Әскери қызметке шақыру азаматтарға SMS-хабарлама және eGov порталындағы жеке кабинеті арқылы жолданады. Әскерге ша­қыруды кейінге қалдыру және одан босату рәсімдері автоматты түрде іске асырылды.

Шақыру науқаны барысында Қорғаныс министрлігінің Ұйымдастыру-жұмылдыру жұмыстары департаменті жергілікті әскери басқару органдарымен бірлесіп, азаматтарды әскерге шақыру мәселелері бойынша жан-жақты ақпараттандыру жұмысын жүргізді. «Қауырт желі» телефондары, азаматтарды жеке қабылдау және ақпараттық-түсіндіру кездесулері барысында шақырылушылар мен олардың ата-аналары өздерін қызықтырған барлық сұраққа толыққанды жауап алды.

Бүгінде Қарулы күштер қатарында Отан алдындағы борышын өтейтін жас азаматтар тек әскери өмірдің дағдыларын ғана меңгеріп шықпайды. Мемлекет тарапынан олардың жан-жақты дамуы мен мамандық игеруіне де жағдай жасалып отыр. Мәселен, еңбек нарығында сұранысқа ие кәсіп түрлерін меңгереді. Әскери қызмет кезінде банктер мен қаржы ұйымдары алдында міндеттемелері бар сарбаздарға несиелік демалыс беріледі. Ал әскери қызметін аяқтағаннан кейін жауынгерлік даярлықта үздік нәтиже көрсеткендер жоғары оқу орындарына мемлекеттік білім гранты негізінде түсе алады.

Нақты мысалға жүгінсек, бірер ай бұрын ғана елордамызда запасқа шыққан әскери қызметшілерге жоғары оқу орындарында тегін білім алу үшін сертификат табыстау салтанатты рәсімі өткен болатын. Оларға Қорғаныс министрінің тәрбие және идеологиялық жұмыс жөніндегі орынбасары, генерал-майор Асқар Мұстабеков білім сертификаттарын тапсырды. «Бұл құжат – сендердің адал қызметтеріңнің лайықты жемісі. Осы мүмкіндікті алда сенімді өсіп-өркендеу үшін пайдалана біліңдер», деп ізгі тілегін білдірді ол.

Қорғаныс министрлігінің бастамасымен 2023 жылы басталған «Сарбаз 2.0» жобасы заң жүзінде бекітілгенін айта кетейік. Бұл жоба әскерде борышын өткерген азаматтарға Ұлттық бірыңғай тест тапсырмай, жоғары оқу орындарына түсуге мүмкіндік береді. Жауынгерлік дайындық үздіктеріне жатақханадан орын беріліп, шәкіртақы да төленеді.

2023–2025 жылдар аралығында жүйеге 180 мыңнан астам әскери қызметші тіркеліп, оның ішінде «Көктем-2025» әскерге шақыру аясында 18 мыңнан астам адам грант алды. Іріктеу қорытындысы бойынша білім гранттары былайша бөлінді: Қорғаныс министрлігі – 492, Ұлттық ұлан – 493, ҰҚК Шекара қызметі – 112, Төтенше жағдайлар министрлігі – 28, Мемлекеттік күзет қызметі – 29 орын.

Қазіргі кезде «Сарбаз 2.0» жобасы әскери қызметшілерді қолдаудың тиімді құралына айналып, әскердегі қызмет жастарға білім беру, кәсіби өсу, сенімді болашақ үшін нақты мүмкіндіктер ашатынын дәлелдеп отыр.