ЖСДП: Астанада қалдықтарды бөлек жинау жобасы таныстырылды

Астанада Жалпыұлттық социал-демократиялық партия пәтер иелерінің кооперативі (ПИК) пен мүлік иелері бірлестіктері (МИБ) тұрмыстық қалдықтарды бөлек жинау жүйесін енгізуге бағытталған ауқымды бірлескен жобаны таныстырды. Іс-шара «Бұқар Жырау» тұрғын үй кешенінің ауласында «Ашық аула күні» форматында өтті,- деп хабарлайды aikyn.kz сайты ЖСДП-ның баспасөз қызметіне сілтеме жасап. 

Таныстырылымға Қазақстан Республикасы Құрылтайы депутаттығына кандидаттар Талғат Тәтіков пен Аслан Құлмағамбетов, қалалық МИБ басшылары, эколог-сарапшылар, ПИК белсенділері мен қала тұрғындары қатысты. Құрылтай депутаттығына кандидат Талғат Тәтіков аула тазалығын сақтаудың маңыздылығына тоқталды.

«Тұрмыстық қалдықтар тұрғындардың пәтерлерінен ғана емес, үйдің бірінші қабатындағы дүкендер мен қоғамдық тамақтану орындарынан да шығады.  "Жасыл даму" бағдарламасымен бірлесіп, аулаларға пластик пен қағаз және картонды бөлек жинауға арналған арнайы торлы контейнерлер орнатылып жатыр. Бұл тазалықты сақтауға әрі қалдықтарды тиімді қайта өңдеуге мүмкіндік береді», – деді ЖСДП-ның өкілі.

Құрылтай депутаттығына кандидат, ЖСДП-ның  өкілі Аслан Құлмағамбетов жобаның қаржылық және ұйымдастырушылық тетіктерін түсіндірді.

«Бұған дейін қалдықтарды екі түрге бөліп жинау қажетті инфрақұрылымның болмауы және тұрғындардың қызығушылығының төмендігі салдарынан толық нәтиже бермеді. Ал біздің жобада жүйе өте қарапайым: тұрғындар қалдықтарды сұрыптап, арнайы контейнерлерге салады, кейін оны жинаушы немесе қоқыс шығаратын ұйымдар сатып алады. Нәтижесінде МИБ үйдің қажеттіліктеріне жұмсай алатын қосымша қаражатқа ие болады. Қазіргі таңда "Zero West" компаниясы пластик пен картонға арналған екі секциялы контейнерлерді және елорданың маңызды орындарына фандоматтарды орнатып жатыр», – деді ол.

«Республика» тұрғын үй кешенінің (D блогы) МИБ төрағасы Шыңғысхан Дүйсенбек жобаның алғашқы нәтижелерімен бөлісті.

«Ең алдымен қоқыс жәшіктері босай бастады. Сонымен қатар аула сыпырушының қосымша табыс табуына мүмкіндік туды. Қайта өңдеуге өткізілген қалдықтардан түскен қаржыға ауламыздың айналасына 500 түп петуния гүлін отырғыздық. "Таза ел" бастамасы өзінің тиімділігін іс жүзінде дәлелдеді. Қазір жобаға 40 тұрғын үй қосылды, ал жалпы тізімде 130 үй бар», – деді ол.

«Zero West» ЖШС-нің тұрмыстық қатты қалдықтарды бөлек жинау жобасының жетекшісі Сергей Гришечкин жобаның негізгі мақсаты тұрғындарды, әсіресе жастарды, қалдықтарды сұрыптауға дағдыландыру екенін айтты.

«Жиналған қайта өңделетін қалдықтардың барлығы өндіріс орындарына жіберіледі. Олардан орындықтар сияқты түрлі пайдалы бұйымдар жасалады. Қазір 30–40 тұрғын үй кешенінде бөлек жинау алаңдарын ұйымдастырып, 10 фандомат орнаттық. Болашақта мұндай мүмкіндік әр тұрғын үйде болып, қалдықтар полигондарда шірімей, қайта өңделіп, қоғам игілігіне қызмет етсе дейміз», – деді ол.

Эколог-сарапшы Әбдіманап Жұмаділдаев қоқысты сұрыптаудың экологиялық маңызына тоқталды.

«Тұрмыстық қалдықтардың шамамен 40 пайызы – картон мен пластик. Демек, осы көлемдегі қалдықтар полигондарға түспейді, ауа мен топырақты ластамайды. Қазірдің өзінде жобаға Шымкент, Алматы және Ақтөбе қалалары қызығушылық танытып, жергілікті әкімдіктермен бірлескен жұмыс жүргізіліп жатыр», – деді сарапшы.

Бұл жоба саяси ұйымдардың, бизнестің және мүлік иелері бірлестіктерінің өзара тиімді ынтымақтастығы қалалық ортаны жақсартуға нақты мүмкіндік беретінін көрсетті. Экологиялық жауапкершілік пен тұрғындарға экономикалық пайда әкелуді ұштастырған бастама елімізде таза әрі көрікті аулаларды қалыптастырып, экологиялық мәдениетті дамытуға бағытталған маңызды қадам болып табылады.