Жылқы жылындағы ортақ құндылықтар: ШЫҰ кеңістігіндегі мәдени үндестік

Қытайда да, ШЫҰ-ға мүше көптеген елдерде де жылқы тек адамның көмекшісі ғана емес, адалдықтың, еңбекқорлықтың және алға ұмтылыстың рухани нышаны ретінде қабылданады. Орталық Азия және ШЫҰ кеңістігіндегі өзге елдердің мәдениетінде жылқы эпостарда, ою-өрнектерде және қолданбалы өнерде маңызды орын алады. Бұл еңбекке, еркіндікке және жауапкершілікке деген құрметті білдіреді. Бас хатшының айтуынша, мұндай ұқсастық халықтарымыздың мәдени кодтарының терең ортақтығын айқындайды.

Чуньцзе дәстүрлері туралы айта келе, ол олардың құндылықтық негізі ШЫҰ елдеріне тән отбасы мен ұрпақ сабақтастығы туралы түсініктермен үндес екенін атап өтті.

— Маған Чуньцзенің отбасының қайта қауышуына ұмтылу дәстүрі ерекше ұнайды. Бұл үрдіс ШЫҰ елдері халықтарына тән отбасылық құндылықтармен, үлкенге құрметпен және ұрпақтар сабақтастығымен тығыз астасады. Менің ойымша, Чуньцзе дәстүрлерінің түпкі мәні — өткенді, бүгінді және болашақты үйлесімді ұштастыру. Дәл осындай өзара құрмет, ынтымақ, жауапкершілік және жасампаздыққа ұмтылыс сияқты құндылықтар ШЫҰ елдері арасындағы мәдени диалогтың негізін қалайды әрі халықтарымыздың одан әрі жақындасуына берік іргетас болады, — деді ШЫҰ Бас хатшысы.

Бүгінде атқа міну, бәйге және командалық жарыстар дәстүрі сақталып қана қоймай, заманауи жобалар аясында дамып келеді. Соның бірі — Дүниежүзілік көшпенділер ойындары. 2026 жылғы халықаралық жарыстар Орталық Азиядағы маңызды мәдени-спорттық оқиғалардың біріне айналмақ. Ойындардың Қырғызстанда өтуі елдің ШЫҰ-ға төрағалық ету кезеңімен тұспа-тұс келіп, шараның өңірлік және халықаралық маңызын арттыра түседі.

Нұрлан Ермекбаев тарихи өлшемнің маңыздылығына да тоқталды.

— Археологиялық және генетикалық зерттеулер деректеріне сәйкес, шамамен бес мың жыл бұрын Қазақстан аумағында өмір сүрген Ботай мәдениеті кезеңінде адам жылқыны тек аңшылық нысаны ретінде ғана емес, көлік құралы ретінде пайдалана бастаған, кейіннен қолға үйреткен. Бұл адамзат өркениетінің дамуындағы бетбұрысты кезең болып, Еуразия кеңістігінде мобильділік, алмасу және мәдени өзара ықпалдастықтың жаңа дәуірін ашты, — деп түйіндеді ол.

Осы тұрғыда ортақ дәстүрлерге негізделген мәдени және гуманитарлық ынтымақтастықты дамыту — тарихи байланыстардың заңды жалғасы. Бұл ШЫҰ-ға мүше мемлекеттер мен олардың серіктестері арасындағы тату көршілікті нығайтуға ықпал етеді.

Бұған дейін Астанадан Қытайға жаңа әуе бағыты ашылатыны хабарланған болатын.