Зиратқа апарып, жүрегі тоқтағанша ұрған : Түркістанда 15 жастағы оқушының өліміне қатысты тың дерек шықты

Түркістан қаласында 15 жастағы мектеп оқушысы сыныптасының соққысынан көз жұмды, – деп хабарлайды Aikyn.kz сайты.

Қайғылы оқиға туралы ақпарат алғаш болып әлеуметтік желілерде тарады.

Марқұмның туыстарының айтуынша, жеткіншекті сыныптастары алдап, қаланың шетіндегі зират маңына шақырған. Сол жерде төрт бала оны кезекпен ұрып, соққының салдарынан оның жүрегі тоқтап қалған. Сондай-ақ, бірнеше ай бойы марқұмды қорқытып, ақша бопсалап келгені де хабарланды.

Облыстық полиция департаменті бұл жайтқа қатысты түсініктеме берді. Ресми ақпаратқа сәйкес, қайғылы жағдай 3 қараша күні болған. Полиция мәліметінше, өлім мектеп аумағында тіркелген.

Құқық қорғау органдары әзірге бір күдіктіні — марқұмның сыныптасын ұстаған. Дәл сол баланың соққысынан қаза болғаны анықталып отыр. Қалған үш жасөспірім де тергеу барысында ұсталып, олар «оқиға кезінде болғандар» ретінде қарастырылуда.

Полиция олардың ата-аналарын да жауапкершілікке тартқанын хабарлады. «Баланы тәрбиелеу жөніндегі міндеттерін тиісінше орындамағаны үшін» әкімшілік іс қозғалған.

Қазіргі уақытта аталған дерек бойынша сотқа дейінгі тергеу амалдары жүргізілуде.