Зорлық зомбылық құрбандарын қорғап жүріп, өз әйелін соққыға жыққан: Жетісуда заңгер сотталды

Жетісу облысында Отбасын қолдау орталығының заңгері жұбайына тұрмыстық зорлық-зомбылық көрсеткені үшін сотталды, деп хабарлайды Tengrinews.kz тілшісі өңір прокуратурасына сілтеме жасап.

Ведомствоның мәліметінше, ер адам тұрмыстық зорлық-зомбылықтан зардап шеккендерге көмек көрсететін "Жанұя" отбасын қолдау орталығында заңгер болып жұмыс істеген. Кәсіби қызметі жәбірленушілердің құқығын қорғаумен байланысты болғанына қарамастан, ол өз жұбайына қатысты әлімжеттік жасаған.

"Қылмыстық істі Қаратал аудандық соты қарады. Сот талқылауы барысында Қаратал ауданы прокуратурасының мемлекеттік айыптаушысы сотталушының кінәсін дәлелдеді", - деп хабарлады прокуратура.

Сот ер адамды тұрмыстық зорлық-зомбылық жасағаны үшін кінәлі деп танып, оған 200 сағат қоғамдық жұмыс түріндегі жаза кесті.

Ведомство құқықбұзушының атқаратын лауазымына, мәртебесіне немесе жұмыс орнына қарамастан, кез келген заңсыз әрекет үшін жауапкершілік жүктелетінін атап өтті.

Тағы оқыңыз: Балаға үйден тыс жерде жасалған зорлық-зомбылықты қалай анықтауға болады: психолог кеңесі

Google News арқылы жаңалықтарымызды қадағалаңыз