2029 жылға қарай ішкі нарықтағы дәрі дәрмектің тең жартысы Қазақстанда өндірілуі тиіс Бектенов

Үкімет басшысы Олжас Бектенов Сенат депутаттарының сауалына орай, Қазақстанда фармацевтика саласын дамытудың жай-күйі туралы айтып берді. Оның сөзінше, Үкіметтің алдында отандық өндірістің ішкі нарықтағы дәрілік заттардың үлесін 2029 жылға қарай 50 %-ға дейін жеткізу міндеті тұр.

"Оған қол жеткізу қазақстандық шикізатты пайдалануды кеңейтумен және белсенді фармацевтикалық ингредиенттер өндірісін дамытумен тікелей байланысты. Әлеуетті инвесторлар үшін салықтық және кедендік преференциялар, инфрақұрылымдық қолдау шаралары, жер учаскелерін беру және өнімді өткізудің ұзақ мерзімді кепілдіктері көзделген. Қолдау отандық шикізатты пайдалануды қоса алғанда, толық өндірістік цикл және терең оқшаулау жобаларына бағытталған. Саланы ғылыми-технологиялық қамтамасыз ету бөлігінде гранттық және бағдарламалық-нысаналы қаржыландыру тетіктері жұмыс істейді", – деді Олжас Бектенов.

Премьер-министрдің сөзінше, салада ірі кәсіпорындар жемісті жұмыс жүргізіп жатыр. 

Мәселен, "QazBioPharm" ҰХ" АҚ еншілес ұйымының базасында Солтүстік Қазақстанда мақсары тәрізді левзеяны енгізу бойынша гранттық ғылыми жоба іске асырылуда. Жоба аясында дақылды көбейту мен өсірудің агробиотехнологиясы әзірленді, интродукциялық питомник құрылды, дала аймағында оның жемдік және дәрілік әлеуеті зерттелді.

"Бұдан басқа, "in vitro" дәрілік өсімдіктердің биологиялық белсенді заттарын алуға және мақсатты синтездеуге, медициналық диагностика үшін жасушалық, геномдық және протеомдық технологияларды әзірлеуге бағытталған ғылыми-техникалық бағдарламалар іске асырылуда. Бағдарламалар шеңберінде молекулалық-генетикалық, биоинформатикалық және биохимиялық зерттеулер жүргізіледі, ферменттер алу технологиялары және қазіргі заманғы молекулалық тәсілдерді пайдалана отырып, фитопрепараттарды сәйкестендіру әдістері әзірленеді", – деді үкімет басшысы.