10 миллионға дейін айыппұл. Қазақстандықтардан Кореяға бірқатар өнімдерді алып келмеу сұралды

Оңтүстік Кореяда жазғы туристік маусым кезінде шетелден баратын жолаушылар жүгін тексеру күшейтіледі, деп хабарлайды Tengri Travel.

NewsDaily мәліметінше, 27 шілде мен 8 тамыз аралығында ел әуежайлары мен теңіз порттарында карантиндік бақылаудың арнайы режимі қолданылады. Оның аясында инспекторлар декларацияланбаған жануарлар мен өсімдік тектес өнімдерге ерекше назар аударады. Карантин қызметі мамандары қол жүгі мен багажды тексеруді қатаңдатады.

Бұл шаралар Оңтүстік Кореяға баратын барлық саяхатшыға, соның ішінде Қазақстан азаматтарына да қатысты.

Жүктен не іздейді?

Апаруға тыйым салынған ауыл шаруашылығы және мал шаруашылығы өнімдеріне баса назар аударылатыны хабарланды.

Күшейтілген бақылауға мыналар жатады:

жас ет; шұжық өнімдері; жас жемістер; жас көкөністер; тиісті құжаттарсыз апаруға тыйым салынған басқа да ауыл шаруашылығы және жануар тектес өнімдер.

Билік өкілдерінің түсіндіруінше, жаз айларында көптеген адам шетелдік сапардан оралғанда, мұндай өнімдерді заңсыз әкелу қаупі артады.

Неге Оңтүстік Корея бақылауды күшейтіп жатыр?

Корея Республикасының Ауыл шаруашылығы, азық-түлік және ауылдық аумақтар министрлігі мәліметінше, тыйым салынған өнімдер ел аумағында жоқ қауіпті вирустардың, өсімдік зиянкестерінің және жануарлар инфекцияларының көзіне айналуы мүмкін. Олардың елге енуі ауыл шаруашылығына айтарлықтай зиян келтіруі ықтимал.

Былтырғы статистика бұл мәселе өзекті екенін көрсетіп отыр. Жазғы демалыс маусымында инспекторлар жалпы салмағы 34 тонна болатын өсімдік шаруашылығы өнімдерін заңсыз әкелудің 23 801 жағдайын, сондай-ақ салмағы шамамен 12 тонна болатын жануар тектес өнімдерді әкелудің 12 019 жағдайын анықтап, жойған.

Әуежайларда қызметтік иттер мен жасанды интеллект қолданылады

Daum мәліметінше, күшейтілген бақылау жүргізу үшін карантин қызметі әуежайлар мен теңіз порттарына қосымша күш жұмылдырады. Инспекторлар мен қызметтік иттер былтыр тыйым салынған өнімдер көп анықталған бағыттарда жұмыс істейді.

Сонымен қатар алғаш рет жасанды интеллект негізіндегі багаждың рентгендік суретін автоматты түрде талдау жүйесін ауқымды түрде қолдану жоспарланған.

Ведомствоның түсіндіруінше, бұл технология чемодан ішіндегі жемістерді автоматты түрде тануға қауқарлы және анықтау дәлдігі жоғары, бұл тексерулерді тезірек әрі тиімдірек жүргізуге мүмкіндік береді. Болашақта жүйені жануар тектес өнімдерді де анықтауға үйрету жоспарланған.

Ереже бұзғандарға ірі көлемде айыппұл салынады

Сондай-ақ өнімдерді заңсыз әкелудің алдын алу бойынша ақпараттық науқан жалғасып жатыр. Ол үшін Карантин қызметі Кеден қызметімен, Балық өнімдері сапасын бақылау ұлттық қызметімен өзара іс-қимыл жасап, көпмәдениетті орталықтар мен YouTube сияқты интернет-алаңдар арқылы түсіндіру жұмыстарын жүргізеді.

Карантин қызметінің басшысы Чхве Чон Рок заманауи технологияларды қолдану демалыс кезеңінде елдің қауіпсіздігін нығайтуға мүмкіндік беретінін мәлімдеді.

"Біз жазғы демалыс маусымында елге қауіпті өсімдік зиянкестері мен жануарлардың жұқпалы ауруларының енуіне жол бермеу үшін әуежайлар мен теңіз порттарында жасанды интеллекті бар рентген жүйелерін қоса алғанда, озық технологияларды қолдана отырып, карантиндік бақылауды күшейтеміз", - деп атап өтті Чхве Чон Рок.

Сондай-ақ ол саяхатшыларға ереже бұзғаны үшін жауапкершілік қарастырылғанын ескертті.

"Егер шетелден ауыл шаруашылығы немесе мал шаруашылығы өнімдерін заңсыз әкелу дерегі анықталса, құқықбұзушыға 10 миллион вонға дейін (шамамен 3,2 миллион теңге) айыппұл салынуы мүмкін. Саяхатшылардан ерекше мұқият болуды сұраймыз", - деді ведомство басшысы.

Осылайша, Оңтүстік Кореяға баруды жоспарлап отырған немесе ол жаққа шетелдік сапардан оралатын қазақстандықтарға жүктерін алдын ала тексеріп, онда әкелуге тыйым салынған өнімдердің жоқтығына көз жеткізген жөн. Бұл бақылаудан өту кезіндегі кідірісті, өнімдердің тәркіленуін және әкімшілік айыппұлды болдырмауға көмектеседі.

Google News арқылы жаңалықтарымызды қадағалаңыз

Жазылу