16 футбол клубы ҚФФ төрешілік департаменті басшысының отставкасын талап етті

Қазақстан Премьер‑лигасы мен Бірінші лига клубтары Қазақстан футбол федерациясының президенті Марат Омаровқа ашық хат жолдады. 

Онда ұлттық чемпионаттағы төрешілікке сенім дағдарысы бар екені айтылып, төрешілік және инспекциялау департаментінің басшылығына қатысты кадрлық шешімдер қабылдау, соның ішінде Нуну Каштрудың отставкасы талап етілді.

Клубтар маусым бойы «жүйелі, қайталанатын қателіктерге» тап болатынын, олардың матч нәтижесіне, турнирлік жағдайға және спорт әділдігіне тікелей әсер еткенін мәлімдеді. 

Хатта мәселе жеке эпизодтарда емес, жалпы сенім дағдарысында екені: «Матч тағдыры ойынмен емес, төрешілердің түсініксіз шешімдерімен анықтала бастағанда, жарыстың әділдігіне деген сенім жойылады», - деп атап өтілген. 

Клубтар өз хаттарында Нуну Каштрудың төрешілік және инспекциялау департаментінің басшысы болып тағайындалуы бастапқыда реформаларға жол ашады деген үмітпен қабылданғанын еске салды. Одан жүйелі тәсіл, ашықтық, төрешілік деңгейін көтеру және жауапкершілікті күшейту күтілді. Алайда қол қойғандардың пікірінше, іс жүзінде жағдай «жақсарған жоқ, тіпті кейбір тұстарда нашарлап кетті».

Клубтар өздерінің басты сын-ескертпелерінде төрешілікті бағалаудың ашық жүйесінің жоқтығын, матч нәтижесіне әсер ететін маңызды қателіктердің ескерілмейтінін, командалармен жеткілікті деңгейде байланыс орнатылмайтынын және жалпы төрешілік институтына деген сенімнің төмендегенін атап өтті.

Клубтардың ашық хатында бес нақты талап көрсетілген. Олар Нуну Каштрудың отставкасымен шектелмейді. Командалар төрешілер корпусына тәуелсіз бағалау жүргізуді, арбитрлерді тағайындау мен бағалау процесін ашық етуді, даулы эпизодтарды жария талқылау жүйесін енгізуді және чемпионатқа қатысушы клубтармен тұрақты диалог орнатуды ұсынды.

Құжатқа Қазақстан Премьер‑лигасы мен Бірінші лига клубтарының өкілдері қол қойған. Олардың қатарында «Астана», «Атырау», «Алтай», «Елімай», «Жетісу», «Жеңіс», «Каспий», «Қайсар», «Қызылжар», «Ордабасы», «Тобыл», «Ұлытау», «Тұран», «Тараз» және басқа командалар бар. Ал чемпионатта көш бастап тұрған «Қайрат» қол қоюшылар қатарында жоқ.

Авторлар жағдайды елдегі футболдың дамуымен байланыстыра қарастырды. Олар биыл мемлекет клубтарды коммерцияландыруға және жаңа стадиондар салуға ерекше көңіл бөліп отырғанын атап өтті. Алайда клубтардың пікірінше, төрешілік мәселесі шешілмейінше, бұл бастамалар Қазақстан футболының жалпы беделіне кері әсер етуі мүмкін.

Материал дайындалған сәтте Қазақстан футбол федерациясы клубтардың үндеуіне қатысты ешқандай жария түсініктеме берген жоқ.

Бүгін, 11:44