20 өңірде бала құқығын қорғайтын басқармалар жұмысын бастады

АСТАНА, 1 маусым – Sputnik. Қазақстанның барлық өңірінде Балалардың құқықтарын қорғау басқармалары құрылды, деп хабарлайды оқу-ағарту министрлігі.

Қазақстанның 20 өңірінде балалардың құқын қорғайтын басқармалар өз жұмысын бастады. Қазіргі таңда бұл басқармаларда 135 маман қызмет атқарады.

Негізгі міндеті - балаларға қатысты мәселелерге жедел ден қойып, қиын өмірлік жағдайға тап болған балаларға нақты көмек көрсету.

Жыл басынан бері қорғаншылық және қамқоршылық органдары қызметкерлерінің саны үш еседен астам өсіп, 303-тен 1029 маманға жетті.

Сондай-ақ мамандар үшін бірыңғай жұмыс стандарттары мен кәсіби даярлау бағдарламалары енгізіліп жатыр. 22 наурыздан бастап мұнда қызмет ететін мамандардың киімдері де белгіленді.