2027 жылы Қазақстанда АЕК қандай болады жаңа мөлшері аталды

Қазақстанда 2027 жылдан бастап айлық есептік көрсеткіштің (АЕК) мөлшері өзгереді. Қаржы министрлігі 2027–2029 жылдарға арналған республикалық бюджет жобасын "Ашық НҚА" порталында жариялады, деп хабарлайды Tengrinews.kz тілшісі.

Жобада алдағы жылға арналған негізгі әлеуметтік көрсеткіштер көрсетілген: АЕК, ең төменгі жалақы, зейнетақы және ең төменгі күнкөріс деңгейі.

2027 жылға арналған негізгі сандар АЕК – 4 693 теңге (2026 жылы – 4 325 теңге). Ең төменгі жалақы – 85 000 теңге (өзгеріссіз). Ең төменгі зейнетақы – 74 919 теңге (2026 жылы – 69 049 теңге). Әлеуметтік төлемдер үшін ең төменгі күнкөріс деңгейі – 55 173 теңге (2026 жылы – 50 851 теңге).

Министрлер кабинеті 2027-2029 жылдарға арналған бюджетті қоғамдық талқылауға шығарды. Содан кейін жоба парламентшілерге жіберіледі. Депутаттар корпусы құжатты әлі де қарастырып, өз түзетулерін енгізеді. Құжат Құрылтайда (жаңа бірпалаталы Парламентте) қабылданған соң – Президентке қол қоюға жіберіледі.

Әдетте, заң жобасын талқылау және өткізу кезеңінде АЕК мөлшері өзгермейді. Тәжірибе көрсеткендей, Үкімет бюджет жобасына бастапқыда енгізген көрсеткіш көп жағдайда соңғы редакцияда да сақталады. Дегенмен, түпкілікті шешім жоба барлық сатыдан өткеннен кейін қабылданады.

АЕК неге әсер етеді?

АЕК-тің өсуі осы көрсеткіш негізінде есептелетін сомаларға автоматты түрде әсер етеді. Ең алдымен, айыппұлдардың, мемлекеттік баждардың және кейбір салық төлемінің мөлшері өзгереді: АЕК неғұрлым жоғары болса, түпкілікті сома да соғұрлым көп болады.

Бірақ АЕК-тің ұлғаюы шығындарға ғана емес, кейбір әлеуметтік төлемдерге де әсер етеді. Жәрдемақылар мен өзге де төлемдердің бір бөлігі АЕК бойынша есептелетіндіктен, олардың мөлшері де артады.

Еске сала кетейік, 25 тамызда Үкімет отырысында Қаржы министрлігі 2027 жылға арналған республикалық бюджет жобасын таныстырды. Мемлекет қанша қаражат алуды жоспарлап отыр, қанша жұмсайды және негізгі шығындар неге бағытталады – сілтеме арқылы оқыңыз.

ҚАЗІР ТАЛҚЫЛАНЫП ЖАТЫР

Қызылорда облысында жыл басынан бері 88 мыңнан астам ағаш көшеті егілді

29 тамыз 15:33 1

Google News арқылы жаңалықтарымызды қадағалаңыз

Жазылу