21 рет пышақтап, полицияға өзі барып берілген : Жаңаөзендегі дәрігер қазасына қатысты тың дерек шықты (ВИДЕО)

Маңғыстау облысының Жаңаөзен қаласында аурухана ішінде болған қанды оқиғаға қатысты жаңа мәліметтер белгілі болды. 29 жастағы терапевт-дәрігер Нұрдәулет Аманғалиев пышақ жарақатынан қаза тапты, деп жазады Alash.kz.

Куәгерлер мен медицина қызметкерлерінің айтуынша, белгісіз ер адам дәрігерге медициналық мекеменің дәлізінде суық қарумен шабуыл жасаған. Марқұм баспалдақ маңында ауыр халде табылған.

Сараптама деректеріне сәйкес, дәрігердің мойын, кеуде тұсы мен қолдарынан көптеген терең жарақат анықталған. Ірі қан тамырлары зақымдалып, көп мөлшерде қан жоғалтқан. Әріптестері шұғыл түрде операция жасауға тырысқанымен, ауыр жарақаттардың салдарынан оның өмірін сақтап қалу мүмкін болмаған.

Алдын ала мәлімет бойынша, қылмыс марқұмның кәсіби қызметіне байланысты емес. Жақындарының айтуынша, күдіктінің жұбайы осы ауруханада медбике болып жұмыс істейді, ал оқиғаға ер адамның негізсіз қызғанышы түрткі болған болуы мүмкін.

Туыстарының дерегінше, марқұмның денесіне 21 рет пышақ сұғылған. Қаза болған дәрігердің анасы болған жайтқа қатысты жанайқайын білдіріп, ұлын өлтірген адамға кешірім бермейтінін айтты.

Қазіргі уақытта аталған дерек бойынша тергеу амалдары жүргізіліп жатыр. Күдікті қылмыстан кейін полицияға өз еркімен берілген, оған қатысты қылмыстық іс қозғалды. Марқұмның жақындары әділ жаза талап ететінін мәлімдеді.