59 пойыз спутниктік интернетке қосылды ҚТЖ

АСТАНА, 8 қыркүйек – Sputnik. "Қазақстан темір жолы" ұлттық компаниясы 59 пойыз спутниктік интернетке қосылғанын мәлімдеді, деп хабарлайды Sputnik Қазақстан тілшісі.

Қай пойызда интернетке қосылуға болады

Бүгінде интернетке қосылған пойыздар 31 бағытта қатынайды. Негізгі бағыттар:

Нұрлы жол – Алматы;

Нұрлы жол – Өскемен;

Нұрлы жол – Орал;

Нұрлы жол – Петропавл;

Алматы-2 – Өскемен;

Қызылорда – Семей;

Ақтөбе – Алматы-1;

Маңғыстау – Ақтөбе;

Орал – Маңғыстау;

Ақтөбе – Қазалы;

Ақтөбе – Атырау;

Павлодар – Алматы.

Ал қыркүйек айының соңына дейін 50 бағыттағы 124 пойыз құрамын, яғни 1 235 вагонды спутниктік интернетпен жабдықтау жоспарланып отыр.

Қандай тарифтер болады

Бүгінде спутниктік байланыс арнасы арқылы интернетке қосылу жылдамдығы секундына 100 Мбитке дейін жетеді.

"Жолаушыларға интернетті пайдаланудың тегін базалық пакеті ұсынылады. Оның аясында WhatsApp және Telegram мессенджерлері арқылы мәтіндік хабарламалар алмасуға қосымша ақы алынбайды. Ал интернеттегі басқа да сервистерді кеңінен пайдаланып, трафик көлемін ұлғайтқысы келетін жолаушыларға қосымша тарифтік пакеттер ұсыну жоспарланып отыр", - дейді компания мамандары.

Бұдан бөлек, спутниктік интернет пойыздарда мультимедиялық, ақпараттық және өзге де цифрлық сервистерді дамытуға мүмкіндік береді.

OneWeb пен Starlink

Бүгінде пойыздарды интернетпен қамтамасыз ету кезінде OneWeb пен Starlink төмен орбиталы спутниктік жүйелер қолданылады. 2025 жылы бес бағытта: Астана – Алматы, Астана – Өскемен, Астана – Бурабай, Астана – Семей және Алматы – Маңғышлақ пойыздарында сынақ жұмыстары атқарылған болатын. Ал 2026 жылы жобаның кеңінен қолдануға шешім қабылданды.

Пойызда интернетке қосылу үшін Wi-Fi желісін таңдап, авторизациядан өту қажет. Осыдан кейін WhatsApp және Telegram мессенджерлері арқылы мәтіндік хабарламаларды жіберуге болады.