Пойыз бен ұшақ жолаушылары интернетке қол жеткізе алады

Қазақстанның спутниктік интернет нарығы кеңеюге дайындалып жатыр – 2026 жылы екі жаңа оператор келеді деп күтілуде. Бұл туралы сейсенбі күні өткен үкімет отырысында Жасанды интеллект және цифрлық даму министрі Жасұлан Мәдиев мәлімдеді, деп хабарлайды Arasha.kz.

Қазіргі уақытта Қазақстанда үш спутниктік интернет операторы жұмыс істеп тұр: Starlink, OneWeb және ұлттық KazSat. Тағы екі шетелдік компанияның келуі дәстүрлі қосылу тәсілдері қиын аймақтарда жоғары жылдамдықты интернетке қол жеткізу мүмкіндіктерін айтарлықтай кеңейтеді. Жаңа операторлардың қатысуымен өтетін пилоттық сынақтар осы жылға жоспарланған.

Тағы бір маңызды жаңалық – «Қазақстан темір жолы» пойыздары мен «Air Astana» ұшақтарында интернетке қолжетімділікті қамтамасыз ету жоспарларының жариялануы.

«Биыл спутниктік интернет «Қазақстан темір жолы» пойыздары мен «Air Astana» ұшақтарында да пайда болады», – деп атап өтті Мәдиев.