65 жастан асқан жүргізушілер екі жыл сайын медициналық тексеруден өтуі керек

Қазақстанда 65 жастан асқан жүргізушілер екі жыл сайын міндетті медициналық тексеруден өтуге тиіс, – деп хабарлайды Aikyn.kz сайты.

Ішкі істер министрлігінің түсіндіруінше, медициналық тексеруден өткені туралы анықтаманы полицияға апарып тапсырудың қажеті жоқ.

Қажетті ақпарат Денсаулық сақтау министрлігі мен Ішкі істер министрлігінің ақпараттық жүйелері арасында автоматты түрде беріледі.

Егер мемлекеттік ақпараттық жүйеде жүргізушінің медициналық тексеруден өткені және көлік жүргізуге медициналық қарсы көрсетілімі жоқ екені туралы ақпарат болмаса, оның көлік құралын басқару құқығы тоқтатылады.

Бұл талап барлық жүргізушіге қатысты емес. Ол 65 жастан асқан жүргізушілерге және мүгедектігі бар жүргізушілерге қолданылады.

Сонымен бірге 65 жасқа толғаннан кейін жүргізуші куәлігін екі жыл сайын ауыстырудың қажеті жоқ. Міндетті талап жүргізуші куәлігін жаңартуға емес, медициналық тексеруден өтуге қатысты.

Заңдағы тағы бір өзгеріс жол қозғалысы ережесін өрескел бұзған жүргізушілерге қатысты. Заңда көзделген жекелеген жағдайларда олар жол қозғалысы ережелері бойынша теориялық емтиханды қайта тапсыруға жіберілуі мүмкін.