Алматы полициясы 65 жастан асқан жүргізушілерді қалай тексеретініне жауап берді

25 тамыздан бастап 65 жастан асқан жүргізушілер екі жылда бір рет медициналық комиссиядан өтуге міндеттеледі. Полиция қарт жүргізушілердің медициналық тексеруден өткен-өтпегенін тексеру үшін оларды арнайы тоқтата ма, жоқ па деген сұраққа жауап берді, деп хабарлайды Tengri Auto.

"Игі мақсатты көздейтін шара"

Алматы полиция департаментінің ресми өкілі Салтанат Әзірбек инспекторлар қарт жүргізушілердің көліктерін арнайы тоқтатпайтынын атап өтті. Тексеріс әдеттегі қызмет атқару режимінде жүргізіледі.

"Бұл патрульдік экипаждардың қызмет өткеруі барысында жүзеге асырылады. Мәселен, жүргізушіні қауіпсіздік белдігін тақпағаны сияқты басқа ереже бұзғаны үшін тоқтатуы мүмкін. Бірақ барлық зейнеткерді жоспарлы түрде анықтап, тоқтату деген болмайды. Бұл шектеу немесе жазалау шарасы емес, игі мақсатты көздейтін шара екенін түсіну маңызды. Ең алдымен, бұл жүргізушілердің өздеріне деген қамқорлық" - деп атап өтті Салтанат Әзірбек.

Полицияның мәліметінше, бұл жаңашылдыққа жол-көлік оқиғаларының алаңдатарлық статистикасы себеп болған. Көлік тізгініндегі қарт адамдардың денсаулығы кенет нашарлауы көп жағдайда ауыр зардапқа әкелетін апаттарға себеп болатыны айтылды.

"Өте жағымсыз статистика бар: қарт жүргізуші денсаулығының сыр беруіне байланысты жол-көлік оқиғасына себепкер болып жатады. Мұндай деректер кездеседі. Жас ұлғайған сайын жүргізушінің реакциясы бәсеңдеп, көру қабілеті де нашарлайды. Сондықтан профилактика әрқашан қажет, оны елеусіз қалдыруға болмайды", - деді Әзірбек.

Автокөлік жүргізушілері медициналық комиссиядан жоспарлы түрде өтуі тиіс. Оның қорытындысы бойынша № 073/у нысанындағы медициналық анықтама беріледі.

Егер 65 жастан асқан жүргізуші немесе мүгедектігі бар адам міндетті медициналық комиссиядан өтпесе, оның жүргізуші куәлігінің қолданысы тоқтатылады.

Мән-жайы: автокөлік жүргізушілеріне қойылатын жаңа талаптар

25 тамыздан бастап "Жол жүрісі туралы" заңға енгізілген өзгерістер күшіне енеді. Жаңа нормалар 65 жастан асқан жүргізушілерге, мүгедектігі бар адамдарға және ЖҚЕ бұзушыларға қатысты болады.

65 жастан асқан жүргізушілер мен мүгедектігі бар адамдарды медициналық тексеру

65 жастан асқан және мүгедектігі бар жүргізушілер міндетті медициналық тексеруден өтуі тиіс.

Тексеріс нәтижесі туралы ақпарат Денсаулық сақтау министрлігі жүйесінен Ішкі істер министрлігіне автоматты түрде түседі. Егер мемлекеттік жүйеде тексерістен өткені және көлік жүргізуге қарсы көрсетілімдердің жоқтығы туралы мәліметтер болмаса, көлік басқару құқығы тоқтатылуы мүмкін.

Фото © Tengrinews.kz / Тұрар Қазанғапов

Жабылған іс бұдан былай куәлікті "құтқара" алмайды

Сондай-ақ 25 тамыздан бастап көлік құралын басқару құқығынан айырудың тағы бір негізі пайда болады. Егер мас күйде көлік жүргізуге қатысты қылмыстық іс айыптау үкімінсіз тоқтатылса (мысалы, тараптардың татуласуына, амнистияға байланысты немесе заңда қарастырылған басқа да негіздер бойынша), жүргізуші бәрібір сегіз жылға көлік жүргізу құқығынан айырылады.

Егер адам әлі жүргізуші куәлігін алмаған болса, ол да осы мерзім ішінде құжатты рәсімдей алмайды.

Сегіз жылдық мерзім аяқталғаннан кейін көлік жүргізу құқығын қалпына келтіру үшін медициналық тексерістен өтіп, жол жүрісі қағидаларын білу бойынша теориялық емтиханды қайта тапсыру қажет.

Ережені өрескел бұзғаны үшін қайта емтихан тапсыруға жіберуі мүмкін

Енді Жол жүрісі қағидаларын өрескел бұзған кейбір жүргізушілер теориялық емтиханды қайта тапсыруға жіберілуі мүмкін. Егер жүргізуші қаулы алғаннан кейін 2 ай ішінде дәлелді себепсіз емтиханға келмесе, ол жүргізуші куәлігінен айырылады.

Google News арқылы жаңалықтарымызды қадағалаңыз

Жазылу