Абай облысында бейбіт атом болашағы жөнінде жиын өтті

Курчатовта «Семей ядролық сынақ полигоны: мұрасы және ғылыми-техникалық әлеуетті дамыту перспективалары» атты XI Халықаралық конференция өтті.

Ауқымды шараға елімізден және Норвегия, АҚШ, Жапония мемлекеттерінен 200-ден астам ғалым мен сарапшы келді.  Қытайдың жоғары оқу орны, Жапонияның атом энергиясы агенттігі және «Росатом» компаниясының мамандары қатысты. Конференция аясында сутегі энергетикасын дамыту, радиациялық экология және медицина салаларындағы өзекті мәселелер талқыланды. Елімізде  салынатын атом электр станциясына мамандар даярлау жайы да айтылды. Ұлттық ядролық орталық директорының айтуынша, станция құрылысы кемінде 10 жылға созылады. «Осы уақыт ішінде Қазақстанда білікті маман даярлауға мүмкіндік бар»,-дейді.

Эрлан Батырбеков, ҚР Ұлттық ядролық орталығының бас директоры:

- Станцияда мамандар екі бағыт бойынша жұмыс істейді. Біріншісі - атом реакциялары арқылы энергия өндіруге жауап беретін ядролық физиктер. Екінші бағыт электр энергиясын өндіру процесі, яғни генерация бөлімі болады. Бұл бөлімнің жұмысы көмір электр станцияларындағы жүйеге ұқсас. Сала  мамандары елімізде үнемі дайындалады, бүгінде ядролық физиктерді даярлайтын бірнеше ЖОО-да бар.