Абай облысында Qazaq Geophysics зерттеулер жүргізіп жатыр

Qazaq Geophysics мамандары Абай облысында аэрогеофизикалық зерттеулер жүргізуде. Барлау жұмыстары Аягөз қаласының маңында жалпы ауданы 550 шаршы шақырымға жуық екі учаскеде атқарылады. Жұмыс пайдалы қазбаларды іздеуге және өңірді егжей-тегжейлі геологиялық барлауға бағытталған. 

Барлық дайындық жұмыстары аяқталғаннан кейін зерттеу аймағына жеңіл моторлы Cessna 206 ұшағы ұшып шықты. Оның бортынан Qazaq Geophysics мамандары жер қойнауын картаға түсіру, минералдық ресурстарды іздеу және геологиялық міндеттерді шешу үшін деректер жинайды. Дала жұмыстары 100-120 метр биіктікте рельефті ескере отырып жүргізіледі.

Ғалым Нұржанов, «Қазақмыс корпорациясы» ЖШС басқарма төрағасының геология және стратегия жөніндегі орынбасары:

- Жылдың басында президентіміз Қазақстанның жерін 2,2 млн шаршы километрге бүкіл геологиялық ақпаратты ұлғайту үшін геофизикалық жұмыстар жасалсын деген болатын. Сол бойынша компаниямыз белсенді атсалысып жатыр. Осы технологияларды болашақта біздің өзіміздің мамандарымыз интерпретация жасап, сосын әрі қарай қай жерлерге бұрғылау жұмыстарын жасау керек екенін геологтарға айтады.

Зерттеулердің далалық кезеңі мен деректерді өңдеу жыл соңына дейін аяқталады, содан кейін геологтар бұрғылауға көшеді. Елдегі геологиялық барлауды одан әрі кеңейту үшін, барлық алынған материалдар Геология комитетіне жіберілетін болады.

Нұрғаным Есімханова, Qazaq Geophysics ЖШС бөлім басшысы:

- Аэрогеофизикалық зерттеулер кешенінің басты мақсаты - минералдық-шикізат базасын толықтыру. Пайдалы қазбалар кен орындарын іздеу және барлау. Бұл жағдайда біз осы аумақта полиметалдар, алтын мен мыс іздейміз.

Qazaq Geophysics компаниясы құрылғалы бері 20 мың шақырым жерді зерттеп, тоғыз аэрогеофизикалық жобаны орындады. Жұмыстар Қазақстанның оңтүстік, орталық, солтүстік және батыс өңірлерінде жүргізілді. 

Авторлары: Серік-Ибраһим Орынбек, Сайлау Игіліков, Аман Хамит