OPEC+ арнайы аудит жүргізіп жатыр

OPEC+-ке мүше елдер келер жылға мұнай квотасын қайта белгілейді, деп хабарлайды 24KZ. «Блумберг» басылымының дерегіне қарағанда қазір арнайы аудит жүргізіліп жатыр.

Тексеріс әр елдің қара алтын өндіру мүмкіндігін саралайды. Өйткені нарықта тепе-теңдік болу үшін ашықтық, сосын нақты сандар сөйлеуге тиіс. Ал бұған дейінгі квоталар қаншалықты дұрыс бөлінген? Мұны халықаралық америкалық компания анықтайды. Әлемде мұнай өндірісінің жартысын уысында ұстап отырған ұйымның бұл шешімі нені аңғартады?

Биыл қара алтын құнын едәуір жоғалтты. Жыл басынан бері Брент маркалы мұнайдың бағасы 15% құлдырады. Келер жылы да қымбаттайтын түрі жоқ. «Өйткені 2026 жылы әлемдік нарықта мұнай артығымен өндіріледі», – дейді Халықаралық энергетика агенттігінің сарапшылары.

Сондықтан әр қадамын аңдып басатын OPEC+-ке мүше елдер тізгінді тарта тұруға уағдаласты. Яғни келер жылы 3 айда мұнай өндіру көлемін арттырмайды. Бұл құлдилаған қара алтын бағасын аспандатпаса да, оны тежей тұруға сеп болары анық. 

Чару Чанана, Saxo Markets сарапшысы:

- Әлемдегі геосаяси ахуал мен ОПЕК+-ке мүше елдердің шешімі қара алтын құнының өсуіне әсер ете алмайды. Бұл бағаның құлдырап кетпеуін тежейтін ғана фактор. Қазір әлемде мұнайдың көп өндірілетіні сонша, шикізатын өткізе алмай жүрген ел көп. Яғни сұраныстан ұсыныс көп. 

Десе де баға одан бетер құлдырап кетпес үшін әр елдің мұнай өндіру әлеуетін білу маңызды. Сондықтан картель аудит жүргізуге тәуелсіз әрі халықаралық деңгейде беделді америкалық компанияны шақырды. Олар OPEC+-ке мүше әр елдің мұнай қорын, технологиялық мүмкіндігін, ұңғымалардың жағдайын тексереді. Бірақ Иран аудиттен мүлдем бас тартты. Мұнайдың орташа өндірісін сақтайтынын жеткізді. 

Ресей мен Венесуэла да Батыс компаниясын елге кіргізуге қарсы. Сондықтан Мәскеу мен Каракас үшін Үндістаннан жеке аудиторлар тартылады. Венесуэла АҚШ оның мұнайына көз тігіп отыр деп санайды. «Тіпті басып кіруге даяр тұр», – дейді.

Делси Родригес, Венесуэла вице-президенті:

- Венесуэла жер қойнауындағы байлығын ешкімге бермейді. Біз бұған көнбейміз. Құрметті Бас хатшы, ОПЕК және ОПЕК+ елдері, бізге қолдау қажет. Өйткені АҚШ-тың бұл басқыншылық әрекеті Венесуэлаға ғана емес, бүкіл әлемдегі мұнай нарығына қауіп төндіріп тұр. Мұнай экспортаушы және импорттаушы елдерге де кері әсері тиеді.

OPEC+ ұйымның өндіріс көлемін арттырмау және Венесуэла мен АҚШ арасындағы текетірес нарыққа тікелей әсер етті. Кейінгі 4 айда нарығы құлдилаған үстіне құлдилап келген Brent және WTI маркалы мұнай кеше алғаш рет барреліне 2% қымбаттады. Алайда мұнай бағасы бір сәтте-ақ өзгеріп шыға келуі мүмкін.  

Сондықтан картель мүшелеріне нарықтағы ықпалын сақтап қалу маңызды. Аудит жүргізуінің басты себебі де осы. «Өйткені бұл ұйымға мүше елдер арасында мұнай өндіру квотасын әділ бөлуге мүмкіндік береді», – дейді сарапшылар. Алайда алдыңғы тексеріс кезінде Ангола ұсынылған квотаға келіспей, OPEC құрамынан шығып кеткен еді.

Авторы: Зайнұр Байжігіт