Абай облысында соғыс ардагерлері мен тыл еңбеккерлеріне құрмет көрсетілді

Облыс әкімі Берік Уәли Жеңіс күні қарсаңында соғыс ардагері, мереке күндеріне орай Мәскеуге барған Григорий Маларовқа байланысқа шығып, мерекемен құттықтады, – деп хабарлайды Aikyn.kz сайты.

Аймақ басшысы бүгінде Абай облысындағы көзі тірі жалғыз майдангерге Қазақстан Республикасының Президенті Қасым-Жомарт Тоқаевтың құттықтау хатын оқып берді.

«Сіздің өмір жолыңыз жас ұрпақ үшін шынайы отансүйгіштіктің үлгісі болып саналады. «Ешкім де ұмытылмайды, ешнәрсе де ұмыт қалмайды» – Жеңіс күнінің барлық мән-мағынасы осы сөздерге сыйып тұр. Халқымыз майдангерлер мен тыл еңбеккерлерінің теңдессіз ерлігін әрдайым есте сақтап, құрметтейтін болады. Барша отандастарымыздың атынан Сізге зор денсаулық пен бақ-береке тілеймін!», – делінген құттықтауда.

Ардагерге мемлекет тарапынан 5 миллион теңге қаржылай сыйақы берілді.

Биыл жазда 100 жасқа толатын Григорий Маларов 19 жасында Отан қорғауға аттанып, соғыс жылдарында майдан жолынан өтті. 2-ші Балтық майданы құрамында Эстония мен Польшаны азат ету шайқастарына қатысып, Берлинге дейін жетті. Майдандағы қайсарлығы арқылы Жеңісті жақындатуға өз үлесін қосты.

Соғыстан кейінгі жылдары Шүлбі ГЭС-інде бас экономист қызметін атқарды. Энергетика саласының дамуына қосқан үлесі мен көп жылғы адал еңбегі үшін «Ерен еңбегі үшін» және «Еңбек ардагері» медальдарымен марапатталды.

Аймақ басшысы бүгін сондай-ақ Семей қаласында тұратын тыл ардагерлері Шайхслям Үскенбаев пен Иван Бельгердің шаңырағына барып, мерекемен құттықтады.

Шайхслям Үскенбаев соғыс басталған жылы 13 жаста болған. Әкесі сол жылдары еңбек армиясына кетіп, шешесі ауылда қалып әскерлерге қолғап тоқып, ауыл шаруасына араласқан. Ол 14 жасынан бастап колхоз жұмысында еңбек етті. 

Майданнан кейінгі жылдары халық депутаттары кеңесі жанындағы ауылдық кеңестің төрағасы қызметін атқарып, ел ішінде сыйлы азамат ретінде танылды. Қоғамдық жұмыстарға белсене араласып, өңірдің әлеуметтік дамуына үлес қосты. Бүгінде Семей қаласында ұрпақтарының ортасында бақытты ғұмыр кешіп отыр. Тоқсан сегіз жасқа келген қария соғыс жылдарындағы жанқиярлық еңбегі үшін бірқатар мемлекеттік наградалармен марапатталған. Ақсақал лебізін білдіріп, кейінгі ұрпаққа ақ батасын берді.

Иван Бельгер 1927 жылы дүниеге келген. Екінші дүниежүзілік соғыс басталған кезде еңбекке ерте араласып, орман шаруашылығында жүргізуші, кейін механик болып ұзақ жыл еңбек етті. Майдан жылдарында Қазақстанға жер аударылған Бельгерлер отбасы Павлодар өңіріне қоныстанып, кейін Майқарағай орман шаруашылығында тұрақтаған. Иван Иванович небәрі 15 жасында үлкен жүк көліктерін жүргізіп, еңбек майданына араласты. Кейін Екібастұз қаласында көміравтоматика саласында бас механик болып еңбек етіп, 58 жылдық еңбек өтілімен зейнетке шыққан. Қазіргі таңда Семей қаласында тұрады. 99 жастағы қария «Ерен еңбегі үшін», «Тың жерлерді игергені үшін», «Еңбек ардагері» секілді көптеген медальдармен марапатталған.

Облыс әкімі тыл еңбеккерлерін Жеңіс күнімен құттықтап, олардың өмір жолы кейінгі ұрпақ үшін үлкен өнеге екенін атап өтті.

«Соғыс жылдары бар ауыртпалықты көтеріп, тылда тынымсыз тер төгіп, елдің еңсесін тіктеуге өлшеусіз үлес қостыңыздар. Мереке қарсаңында хал-жағдайларыңызды біліп, облыс жұртшылығы атынан құттықтайық деп арнайы келіп отырмыз. Сіздердің өмір жолдарыңыз кейінгі ұрпаққа үлгі-өнеге, үлкен мектеп», – деді Берік Уәли.

Айта кетейік, өңірімізден 100 мыңға жуық азамат отан қорғауға аттанып, олардың 44 мыңнан астамы туған жерге оралмады. Майдан даласында көрсеткен теңдессіз ерлігі үшін 56 жерлесімізге Кеңес Одағының Батыры атағы берілді.