Шымкентте құтқарушыларға құрмет көрсетілді

Шымкентте азаматтық қорғаныс саласының дамуына үлес қосқан қызметкерлерге мерекелік медаль табысталды.

 Сонымен қатар төтенше жағдайлар кезінде алғы шепте жүрген құтқарушыларға «Құрмет төсбелгісі» тағылып, батылдығы мен кәсібилігі үлгі етілді. Салтанатты іс-шараға сала ардагерлері де қатысты.

Мерекелік кеште мемлекеттік ту салтанатты жағдайда сахнаға шығарылды. Әскери оркестрдің сүйемделдеуімен әнұран орындалып, өрт сөндіру кезінде қаза тапқан құтқарушылардың рухына тағзым етілді. Қала әкімі төтенше жағдайлар қызметінің қоғам өміріндегі маңызына тоқталып, тілектестік білдірді.

Ғабит Сыздықбеков, қала әкімі:

- Ел тыныштығы мен халқымыздың амандығы жолында игі істеріңіз әрқашан сәтті болып, амандықта болыңыздар! Біз сіздерді құрметтейміз, сыйлаймыз. Өз тарапымыздан қолдай да береміз. Жігерлі еңбектеріңізді осылай абыройлы атқара беріңіздер! 

Салтанатты жиында азаматтық қорғаныс саласының бірқатар қызметкеріне мерекелік медаль табысталды. Сондай-ақ халықтың қауіпсіздігі мен тыныштығы үшін аяндай еңбек етіп, ерлік көрсеткендерге арнайы төсбелгі тағылды.

Орынбасар Төртбаев, қалалық ТЖД жедел құтқару жасағының басшысы:

- Мен өз мамандығымды мақтан етемін. Қазіргі таңда біздің ТЖМ көптеген жағымды жаңалықтар болып жатыр. Жағдайлар жасалып жатыр. 30 жылға таяу еңбек етіп жатырмын. Бәріне рақмет. ТЖМ қызметкерлерін мерекемен құттықтаймын. 

Мерекелік жиында органның озық үлгідегі техникалары мен құрал-жабдықтар көрмесі ұйымдастырылды. Заманауи жол талғамайтын көліктер мен күрделі жағдайда кедергісіз жұмыс істеуге арналған ауыр машиналар таныстырылды.

Бекзат Қамбаров, қалалық ТЖД бастығының бірінші орынбасары:

- Төтенше жағдай болған жерден біз онлайн режимде кез келген мемлекеттік мекемеге, Қазақстанның кез келген жеріне картинка бере аламыз. Мұның тиімділігі тез ақпарат жеткізуде, тез көп сұрауда. Толықтай штаб жұмыс істей алады. 

Қала аумағында 10 өрт сөндіру бөлімінде мыңға тарта маман еңбек етеді. Сондай-ақ оқыс жағдайларға бірінші жететін жедел-құтқару жасағы құрылған. Биыл шалғай шағын аудандардың өртке қарсы қауіпсіздігін күшейту үшін төрт бірдей кешеннің құрылысы басталды.

Нұрсұлтан Мұхамеджан, Нұрмахан Бекмұратов, Нұрмахан Мұсатов