Әбутәліп Мүтәлі: Цифрлық кодекс бюрократияны көбейтетін құжатқа айналмауға тиіс

Бүгін Мәжілісте өте маңызды құжат – Қазақстан Республикасы Цифрлық кодексінің жобасы қаралды, – деп хабарлайды Aikyn.kz сайты. 

Бұл құжатқа байланысты  Мәжіліс депутаты, «AMANAT» партиясы фракциясының мүшесі, Қазақстан Республикасы Цифрлық кодексінің жобасы жөнінде Экономикалық реформа және өңірлік даму комитетінің мүшесі Әбутәліп Мүтәлі өз пікірін білдіріп, оның еліміздің цифрлық саласындағы ұзақмерзімді даму бағыттарын айқындайтын маңызды бастама екенін атап өтті.

«Бұл жай ғана кезекті заң жобасы емес, бұл – еліміздегі цифрлық саланың ұзақмерзімді дамуын айқындайтын және тиімді әрі ашық цифрлық ортаны қалыптастыратын басты құжат», – деді депутат.

Ә.Мүтәлі өз сөзінде цифрландыру экономиканың дамуына және мемлекеттік басқарудың тиімділігін арттыруға ықпал ететін негізгі факторлардың бірі екенін атап өтті. Сонымен қатар ол депутаттық бастаманы көтерген әріптестерінің рөлін ерекше бағалап, бұл бастаманың дер кезінде көтерілгенін жеткізді.

Цифрландыру саласында Ұлттық даму институтын құру туралы ұсынысқа байланысты ол нақты функциялар мен міндеттерді анықтаудың маңыздылығына тоқталды.

Ол бұған дейін құрылған «Зерде» холдингі тәжірибесінің тиімсіз болғанын еске салып:

«Іс жүзінде функциялардың шоғырлануына, тиімсіздікке және қағазбастылыққа алып келді», – деді.

Әбутәліп Мүтәлі дербес деректерді қорғау мен киберқауіпсіздік мәселесіне де ерекше назар аударды.

«Кодекс жобасында бұл мәселелерге арналған жеке баптар бар, алайда олар цифрлық ортадағы барлық қатысушылардың мүддесін нақты қорғау үшін әлі де пысықталуы қажет», – деді ол.

Депутат интернет-алаяқтықтың және жеке ақпаратты заңсыз пайдаланудың кең таралғанын ескере отырып, нақты шешімдер ұсынды. Ол дербес деректер операторларына бірыңғай талаптар енгізу, ақпараттық жүйелерді тұрақты аудиттен өткізу, ІТ жүйелерді сертификаттау және деректердің таралуы жөнінде азаматтар мен уәкілетті органдарға міндетті түрде хабарлау тәртібін орнату қажеттігін айтты.

«Осы тетіктерді енгізу қауіптерді дер кезінде анықтауға, келеңсіз жағдайлардың алдын алуға және азаматтардың, бизнес пен мемлекеттің мүддесін қорғауға мүмкіндік береді. Сонымен қатар мұндай шаралар елдің цифрлық және ұлттық қауіпсіздік мақсаттарын тікелей қолдайды», – деді депутат.

Сөз соңында ол Цифрлық кодекстің түпкі мақсатын нақтылай келе:

«Цифрландырудың өзі түпкі мақсат емес екенін айқын түсінуіміз қажет. Ол – адамдардың өмір сүру сапасын арттыруға, бизнестің дамуына және мемлекеттік басқарудың тиімділігін күшейтуге қызмет ететін құрал. Біздің негізгі міндет – Цифрлық кодексті дәл осындай тиімді тетікке айналдыру. Ол бюрократияны көбейтетін немесе жаңа шектеулер тудыратын құжатқа айналмауы тиіс», – деп сөзін түйіндеді депутат.