Әділет партиясы: Қазақстанның ең басты байлығы еңбек адамы

Басқосуда өнеркәсіпті экологияға зиян келтірмей дамыту, жаңа жұмыс орындарын құру, кәсіпорындарды жаңғырту және инфрақұрылымды жетілдіру мәселелері талқыланды.

«СНПС-Ақтөбемұнайгаз» АҚ ұжымымен кездесуде кәсіпорын заңгері Нұржан Әуесов жұмыспен қамту және жаңа жұмыс орындарын ашу мәселесін көтерді. Ал Құрылтай депутаттығына кандидат Ерлан Саиров партияның сайлауалды бағдарламасында ел бойынша 1 миллион сапалы жұмыс орнын құру көзделгенін айтты. Оның ішінде Ақтөбе облысында бірқатар ірі инвестициялық жобаны жүзеге асыру жоспарланып отыр. Сондай-ақ, оның айтуынша, отандық өнеркәсіп пен өңдеу өндірісін дамытуға ерекше назар аударылады.

Бұдан бөлек, мұнай компаниясының қызметкерлері экология, жол инфрақұрылымын дамыту және өңір тұрғындарының өмір сүру сапасын арттыру мәселелеріне қызығушылық танытты. Республикалық сайлауалды штаб мүшелері Унзила Шапақ, Ренат Бектұров, Қарлығаш Жаманқұлова және Ербол Данағұлов бағдарламаның «Қуатты өңірлер – қуатты ел» бағытын таныстырды. Онда бір адамға шаққандағы тұрғын үймен қамтылу көлемін 25 шаршы метрден 30 шаршы метрге дейін ұлғайту, ипотекалық тұрғын үй рәсімдеу тәртібін жеңілдету, 2029 жылға дейін республикалық маңызы бар 10 мың шақырым жолға орташа жөндеу жүргізу, сондай-ақ 2030 жылға дейін 86 мың шақырым инженерлік желіні салу және жаңғырту көзделген.

«СНПС-Ақтөбемұнайгаз» АҚ қызметкері Абай Сақтағанов ұсынылған бастамалардың өңір үшін өзекті екенін атап өтті.

«Қуантатыны – «Әділет» партиясының сайлауалды бағдарламасы ақтөбеліктердің сұранысына нақты жауап береді. Бүгінде кәсіпорындарға тең жағдай жасап, отандық өндірісті қолдап, өңдеу өнеркәсібін дамыту және еңбек адамын қорғау аса маңызды», - деді ол.

Ақтөбе ферроқорытпа зауытының еңбек ұжымымен кездесуде әлеуметтік саясатты жетілдіруге бағытталған бастамалар таныстырылды. Атап айтқанда, партия әлеуметтік төлемдердің басым бөлігін проактивті форматқа көшіруді, әлеуметтік қолдаудың бірыңғай цифрлық платформасын құруды, мүгедектігі бар адамдарға арналған әлеуметтік ваучерлер жүйесін кеңейтуді және қарттарға көрсетілетін көмектің заманауи түрлерін дамытуды ұсынады.

Кәсіпорынның жас маманы Жәнібек Төлепов партияның сайлауалды бағдарламасымен танысып шыққанын және жастар саясатын дамытуға қатысты ұстанымын қолдайтынын айтты.

«Мен зауытқа жас маман болып келдім. Алғашқы күннен бастап жанымда тәжірибелі тәлімгер болды. Оның қолдауының арқасында мамандығыма тез бейімделіп, өз жұмысыма сенімді болдым. Бүгінде біздің кәсіпорында жастарға ерекше көңіл бөлінеді. Осындай жағдай еліміздегі барлық кәсіпорында болуы керек деп есептеймін. Сондықтан жастардың мүмкіндігін кеңейтуге және еңбек адамын қолдауға бағытталған «Әділет» партиясының бастамаларын қолдаймын», - деді ол.

Кездесулердің қорытындысын шығарған «Әділет» партиясының төрағасы Айбек Дәдебай өнеркәсіпті дамыту мен еңбек адамын қолдау партияның сайлауалды бағдарламасындағы негізгі басымдықтардың бірі екенін атап өтті. Оның айтуынша, партия Қазақстан Президентінің бағытын және Мемлекет басшысы жүргізіп отырған жұмысшы мамандықтарының беделін арттыруға, отандық өндірісті дамытуға және еңбек адамы үшін жаңа мүмкіндіктер жасауға бағытталған реформаларды толықтай қолдайды.

«Біз өнеркәсіпті тек экономикалық өсімнің негізі ретінде ғана емес, сапалы жұмыс орындарының қайнар көзі ретінде де қарастырамыз. Сондықтан партия бағдарламасында тау-кен металлургия кешенін ұзақ мерзімді дамыту, кәсіпорындарды жаңғырту, энергия тиімді технологияларды енгізу және қосылған құны жоғары өнім өндірісін ұлғайту көзделген. Сонымен қатар кадр даярлауды да маңызды міндеттердің бірі санаймыз. Біз дуальды білім беру жүйесін кеңейтуді, кәсіпорындардың колледждермен және жоғары оқу орындарымен ынтымақтастығын нығайтуды, өндірістік тәжірибені күшейтуді және мамандарды қайта даярлау бағдарламаларын қолдауды жоспарлап отырмыз. Біздің мақсатымыз – жастар оқуын аяқтағаннан кейін бірден еңбек нарығында сұранысқа ие болуы», - деді Айбек Дәдебай.

Жалпы партия 2031 жылға қарай өндірісте тәжірибеден өтіп, білім алатын студенттердің үлесін 45 пайызға дейін арттыруды көздейді. Сондай-ақ заманауи құрал-жабдықтармен жабдықталған салалық құзырет орталықтарын құру, техникалық жоғары оқу орындарының мамандануын өңірлер экономикасының сұранысына бейімдеу және академиялық үздік орталықтарын дамыту жоспарланып отыр. Одан бөлек жобалық оқытуға, өндірістік тағылымдамаларға және өндірістегі нақты міндеттерді шешуге ерекше басымдық беріледі.

«Әділет» партиясы республикалық сайлауалды штабының Ақтөбе облысындағы жұмыс сапары жалғасады.

Партияның қызметі туралы басқа да жаңалықтарды ресми Telegram-арнамыздан оқи аласыздар: https://t.me/adilet_partiyasy