Айыппұлын төлемеген шетелдік жүргізушілерге елге кіруге тыйым салынуы мүмкін

Қазақстанда жол қозғалысы ережесін бұзып, айыппұлын өтемеген шетелдік көлік жүргізушілеріне ел аумағына қайта кіруге шектеу қою мәселесі қарастырылып жатыр.
Бұл туралы Ішкі істер министрлігі мәлімдеді. Ведомствоның хабарлауынша, шетелдік мемлекеттік нөмірлі көліктерді анықтау бірыңғай сақтандыру деректер базасы, шекарадан өту кезінде жиналатын ақпарат және өзге де мемлекеттік жүйелер арқылы жүзеге асырылады.

ІІМ дерегінше, жол ережесін бұзуды тіркейтін стационарлық және мобильді фото-бейнетіркеу кешендері шетелдік нөмірлі автокөліктерді де анықтай алады. Дегенмен, әр елдегі нөмір форматтары мен қаріптердің әртүрлі болуына байланысты кейбір техникалық қиындықтар кездесетіні айтылды.

Құқық қорғау органдары шетелдік көліктерді бақылауды күшейту мақсатында сақтандыру базалары мен ҰҚК Шекара қызметінің ақпараттық жүйелерін біріктірген. Сонымен қатар полиция «Тор» жүйесін пайдаланып, жалған нөмірмен жүрген, сақтандырусыз немесе айыппұлын төлемеген көліктерді анықтайды.

Министрлік мәліметінше, егер шетелдік азаматтың Қазақстанда бұрын салынған әкімшілік айыппұлдары өтелмеген болса, оған елге қайта кіруге тыйым салынуы мүмкін.