Әкеміз бізді ұрып соғып, анамызды қорлайтын : Ақтөбеде 5 қыздың жанайқайы қоғамды дүрліктірді

Ақтөбе қаласында Есболовтар отбасының бес баласы өз аналары Жұлдыз Тлеуфті қорғауды сұрап, көмекке жүгінді, – деп хабарлайды Aikyn.kz сайты.

Қазір олар жалдамалы пәтерде тұрып жатыр, ал анасы психиатриялық орталықта.

Журналист Гүлмира Әбіқайдың айтуынша, олардың анасы жындыханаға жабылып, ал ішімдікке салынған әкесі балалармен қайта қауыштырылған.

Әбіқай жазғандай, үлкен қыз Құралай өз жазбасында әкесінің оларды бала кезден ұрып-соғып, ішімдік ішкенде "басқа адамға айналатынын" айтқан.

"Әкеміз деп айтқанымен өмірі қамқорлығын көрмедік, жылы сөзін естімедік. Кішкентай кезден тек анамызды, бізді ұрғаны ғана есте қалды. Ол ішкенде басқа адам болып кететін (бәлкім шегетін шығар). Бесеуміз тез үйді босатып, ақ қар көк мұзда далада қаңғып жүретінбіз, – деп жазған ол.

Қазір Құралай 18 жасқа толған және анасының диагнозы нақтыланғанша төрт сіңлісін қамқорлығына алғысы келеді. Алайда балалардың биологиялық әкесі бұған кедергі келтіруде.

Журналист бұл жағдайда Ақтөбе облысының құзырлы органдары мен бала құқығын қорғау қызметінің әрекетсіздігін сынға алды:

«Құралай 18-ге толған, анасының диагнозы біржақты болғанша 4 сіңілісін асырап алайын десе, олардың биологиялық әкесі кедергі. Қоеам тұрмақ балаға пайдасыз мұндай адамды 5 қызбен енді жақындастыруға тырысқанша, неге әке құқынан айырмайды? Ақтөбенің органдары бала құқын қорғауға неге тым құлықсыз?» – дейді Гүлмира Әбіқай.