Әкімдік неліктен Мәдениет сарайын көрсетпей отыр?

Қоғамдық бақылау тобы жүргізіліп жатқан ғылыми-реставрациялық жұмыстардың барысымен танысу үшін үш айдан бері Құрманғазы атындағы Мәдениет сарайына кіре алмай жүр.

Еске сала кетсек, республикалық маңызы бар сәулет және қала құрылысы ескерткіші саналатын бұл ғимараттың реставрациясы өткен жылдың маусым айында басталған. Негізгі жұмыстарды «Жалынды құрылыс» компаниясы атқаруда, ал инженерлік жүйелерді ретке келтіруді «AGM Service» қолға алған. Жобаның жалпы құны - шамамен бір миллиард теңге.

Атырау әкімдігінің Мәдениет сарайына заңсыз күрделі жөндеу жасауға әрекеттенгені және жергілікті биліктің тарихи-сәулет мұрасына жалпы көзқарасы қоғамда сынға ұшырағандықтан, бір топ белсенді тұрғын қоғамдық бақылау тобын құрды. Оның құрамына қала мен облыс мәслихатының депутаттары, туроператор өкілдері және сіздің тілшіңіз кірді.

Құрманғазы атындағы Мәдениет сарайына алғаш әрі бір рет тамыз айында кірдік. Сол кезде реставрацияға жауапты мамандар жоспарларымен бөлісіп, интерьердің аз ғана түпнұсқа бөлшектерін көрсетіп, оларды сақтап қалуға бар күш салатынын айтты. Кездесу «екі-үш айдан кейін тағы жолығамыз» деген уәдемен аяқталды. Осымен жылы қабылдау тоқтады.

Қараша айында Құрманғазы атындағы Мәдениет сарайының уақытша директоры Асхат Жахиев «барлық ақпарат тек қала әкімдігінің баспасөз қызметі арқылы беріледі» деп мәлімдеді. Ал әкімдік үш айдан бері түрлі сылтаулармен (баспасөз турын дайындап жатырмыз, мерекеден кейін, қаңтарда жоспарлап отырмыз деген сияқты) нысанға кіруді кейінге шегеріп келеді. Ақыры баспасөз қызметі «нысанды наурызда көрсетеміз» деген қала басшылығының соңғы ұстанымын жариялады.

Айта кету керек, реставрация жұмыстары сәуірде аяқталуы тиіс. Яғни әкімдік ғимаратты жұртшылыққа іс жүзінде ашылуына санаулы күндер қалғанда ғана көрсетпек. Неліктен биліктің жұртшылықты кіргізбеуге соншалықты тырысатыны әзірге түсініксіз, бұл ғылыми-реставрациялық жұмыстардың сапасына сенім тудырып отырған жоқ. Әкімдік ресми түсініктеме бермейтінін де ашық білдірді.

Лев ГУЗИКОВ

Александр Шергиловтың парақшасынан алынған суреттер («Одноклассники» әлеуметтік желісі, 2025 жылғы қараша)

Бүгін, 11:47