Әл Фарабидегі ажал апаты Александр Пакқа үкім шықты

Алматыда Әл-Фараби даңғылында үш адамның өмірін қиған атышулы жол-көлік оқиғасына қатысты үкім шықты. Сот Александр Пакты кінәлі деп танып, 10 жылға бас бостандығынан айыру жазасын кесті, - деп хабарлайды Tengrinews.kz.

Алматыда Әл-Фараби даңғылында үш адамның өмірін қиған атышулы жол-көлік оқиғасына қатысты үкім шықты. Сот Александр Пакты кінәлі деп танып, 10 жылға бас бостандығынан айыру жазасын кесті, - деп хабарлайды Tengrinews.kz.

22 маусымда Алматы қаласының қылмыстық істер жөніндегі мамандандырылған ауданаралық соты 33 жастағы Александр Пакқа қатысты үкім шығарды.

Судья Еркін Майшинов оны Қылмыстық кодекстің 345-1-бабы 4-бөлігі "Алкогольдік масаң күйде жол жүрісі қағидаларын бұзу, абайсызда екі немесе одан да көп адамның өліміне әкеп соғу" бойынша кінәлі деп таныды.

Сот оны 10 жылға бас бостандығынан айыруға үкім кесті. Ол жазасын қауіпсіздігі барынша төмен мекемеде өтейді.

Сондай-ақ сот қаза тапқан 20 жастағы Т.К.-ның әкесінің азаматтық талап-арызын ішінара қанағаттандырып, Пакты 10 миллион теңге көлемінде моральдық зиян өтеуге міндеттеді. Бұған дейін марқұмның әкесі 100 миллион теңге өтемақы талап еткен болатын.

Сот үкімі заңды күшіне енген жоқ.

Анықтама: Еске сала кетейік, баптың санкциясында белгілі бір лауазымдарды атқару немесе белгілі бір қызметпен айналысу құқығынан өмір бойына айыра отырып, 7 жылдан 10 жылға дейін бас бостандығынан айыру жазасы қарастырылған.