Алатау қаласының статусы, бір палаталы Парламент, саяси партиялардың дамуы: депутаттар жаңа Конституцияның жобасын түсіндірді

«Референдум-2026» онлайн-марафоны барысында Мәжіліс депутаттары, «AMANAT» партиясы фракциясының мүшелері Альберт Рау мен Нұртай Сабильянов, одан бөлек Мәжіліс депутаты Ермұрат Бапи жаңа Конституция жобасындағы негізгі жаңалықтар мен елдің саяси дамуына әсерін түсіндірді, – деп хабарлайды Aikyn.kz сайты.

Альберт Рау жаңа Конституциядағы «жедел дамитын қала» тұжырымдамасы мен Алатау қаласының ерекше статусын нақтылады.

— Алатау тек жаңа қала емес, бұл инвестициялар мен технологиялар орталығы болады. Онда ерекше валюталық жүйе, жаңа технологиялар, қаржы қызметтері, криптовалюта, автономды көліктерге арналған арнайы ережелер қарастырылған. Экологиялық талаптар да ұлттық стандарттардан төмен болмайды, қоқыс тек бөлшектеп жиналады,-деді ол.

Оның айтуынша, жаңа қала Астанадағы тәжірибені қайталамай, инвестициялар мен технологиялар орталығы ретінде дамиды. Қала әкімшілігі мен Жоғарғы кеңес халықаралық стандарттар мен үздік практикаларға сүйене отырып жұмыс істейді.

— Қала әкімшілігі мен Жоғарғы кеңес премьер-министрдің басшылығымен халықаралық тәжірибеге сүйене отырып жұмыс істейтін болады. Қаланың ішкі ережелері халықаралық стандарттар мен үздік практикаларға сай жасалады, — дейді Мәжіліс депутаты Альберт Рау.

Нұртай Сабильянов бір палаталы Парламентке көшу депутаттардың жауапкершілігін арттыратынын және заң шығару сапасын жақсартатынын атап өтті.

– Болашақ Құрылтай – Қазақстандағы заң шығару билігін жүзеге асыратын ең жоғарғы мемлекеттік орган. Құрылтайда заң жобасы талқыланады, үш оқылымда қабылдануы мүмкін. Заң сапасына ешқандай кері әсерін тигізбейді. Керісінше, заңның бір жерден қабылдануы уақытын жылдамдатады және депутаттардың жауапкершілігін арттырады. Заңның сапасын да жақсартады, - дейді депутат Н. Сабильянов.

Құрылтайда 145 депутаттың болуы әр өңірдің, соның ішінде шалғай ауылдардың да мүддесін ескере отырып, заңдарды сапалы қабылдауға мүмкіндік береді. Сонымен қатар, депутаттар пропорционалдық жүйе арқылы сайланатындықтан, саяси партиялардың рөлі күшейеді.

– Елімізде 17 облыс, 4 қала бар. Әлемде аумақ бойынша Қазақстан тоғызыншы орында, жері үлкен. Ал депутаттар әр қалаға, әр ауданға, шекарадағы шалғай ауылдарға барып, халықпен жұмыс істеуі керек. Сол себепті, депутаттардың саны 145 деп белгіленіп отыр. Басты мақсат – шығарылатын заңдардың сапалы болуы және халықтың мәселелерін шешу, - деді Н. Сабильянов.

Ермұрат Бапи жаңа Конституция жобасы қабылданса, қоғамда партиялық құрылымдардың дамуы күшейетінін және азаматтардың саяси ұстанымына сай партияларға қосылу арқылы ортақ идея мен мемлекеттік мүдделерге жұмылуына жағдай жасалатынын айтты.

— Осы күзде келеді деп отырған Құрылтайымызда қазіргі Мәжілістегі алты партия сол қалпында баратын болса, онда қоғам бізді түсінбейді. Бейнелеп айтқанда, «бұзаудың орнына тұлып ұсындыңдар» ғой деген түсінік болады. Сондықтан сайлауға дайындық барысында партиялар бірігуі мүмкін, әлдебір конструкциялар жасалады, жаңа партиялар пайда болуы мүмкін деп ойлаймын. Қызылорда құрылтайында қоғамды партиялық институттар негізінде біріктіру бастамасы айтылды. Азаматтар өзінің саяси ұстанымына сай келетін партияларға мүше болу арқылы ортақ идеяға, мемлекеттік мүдделерге жұмылу мүмкіндігі күшейеді деп ойлаймын, — дейді депутат Ермұрат Бапи.

Сондай-ақ, жаңа Құрылтайдың өкілеттіктерін қолдай отырып, ол Конституцияның елдің дамуы мен болашақ қауіпсіздігін қамтамасыз етуге бағытталғанын атап өтті.

— Жеке ойымды айтсам, 100 пайыз көңілім толады деп айта алмаймын. Бірақ бұл елдің дамуына, болашақтың қауіпсіздігін қамтамасыз етуге, Тәуелсіздік пен Егемендікке кепіл болуға арналған Конституция болғандықтан мен оны азаматтық тұрғыда, перзенттік парыз тұрғысынан қолдаймын. Бұл үлкен тәуекелдердің алдындағы дайындықтың қамы болғандықтан азаматтық жанашырлықпен қарауымыз керек. Бұл жерде ары-бері тартып, қоғам мен биліктің арасында ырың-жырың туатындай жағдай дәл қазіргі әлемде қажет емес, — деді депутат Е. Бәпи.