Әлімжеттік жасаған офицер сотталды

АСТАНА, 3 сәуір – Sputnik. Алматы гарнизонының әскери соты сарбазға әлімжеттік жасаған офицерге қатысты үкім шығарды, деп хабарлайды Sputnik Қазақстан.

Тергеу материалына сәйкес, аға лейтенант өзіне бағынатын адамға күш қолданып, демалыс уақытында жұмысқа салған. Осылайша, өз өкілеттігін асыра пайдаланған.

Сотта прокурор офицерді 3 жылға бостандығын шектеуді сұрады. Ал сотталушының өзі кінәсін толық мойындап, жәбірленушіге материалдық және моральдық зиянды өтеуге дайын екенін мәлімдеді. Адвокат 1 жыл 6 айға ғана бас бостандығынан шектеуді өтінді.

Бірақ жәбірленуші офицерді заң барынша қатаң жазалауды және моральдық әрі материалдық шығынды талап етті.

Офицер кінәсін мойындаса да, әскери антты бұзып отыр. Бұл жазаны ауырлататын мән-жай болып саналады. Осыған байланысты судья оған 2 жыл бостандығын шектеу жазасын кесті. Сонымен қатар, "аға лейтенант" әскери шенінен айыруға шешім шығарды.

Жәбірленушінің пайдасына материалдық және моральдық шығын да өндіріледі. Сот үкімі заңды күшіне енген жоқ.