Алматы полициясы рэпер De Lacure ге қатысты тексеруді аяқтады

Қазақстандық рэпердің даулы мәлімдемесінен кейін Алматы полициясы тексеру жүргізді, – деп хабарлайды Aikyn.kz сайты.

Тергеуге оның ойын-сауық бағдарламасында айтқан әңгімесі себеп болған. Аталған шығарылым эфирге шықпағанымен, түсірілімге қатысқандардың сөзінше, De Lacure сахналық есімімен танымал рэпер Әнуар Баймұхаев әйелге қатысты зорлық-зомбылық туралы оқиға айтқан.

Осыдан кейін әлеуметтік желі қолданушылары музыкант пен оның достарының әрекетіне құқықтық баға беруді талап етті.

Кейін рэпер жағдайға қатысты пікір білдіріп, оқиға барысында өзі тарапынан да, досы тарапынан да ешқандай зорлық-зомбылық болмағанын мәлімдеді.

Әлеуметтік желідегі резонанстан соң Медеу аудандық полиция басқармасы тексеру жүргізіп, Әнуар Баймұхаев түсініктеме беру үшін полицияға шақырылған.

Полиция департаментінің мәліметінше, тексеру барысында рэпер әлеуметтік желілерде тараған ақпараттың бұрмаланғанын айтқан.

– Қазіргі уақытта қылмыстық құқық бұзушылық болғанын растайтын объективті деректер анықталған жоқ, – деп хабарлады ведомство.

Қазір Әнуар Баймұхаевқа қатысты тексеру аяқталды. Алматы полициясы тұрғындарды жалған ақпарат таратпауға шақырды.