Алматы Жаңа жылды ерекше сән салтанатпен қарсы алуға дайын

Алматы Жаңа жылды ерекше сән-салтанатпен қарсы алуға дайын.

Орталық көшелер мен алаңдар мерекелік шамдармен безендіріліп, қала ертегі әлеміне айналғандай. Сондай-ақ шағын аудандардағы көпшілік жиналатын орындар да көркейтіліп, қала бойынша  мерекелік атмосфера қалыптасты. Айтпақшы, қоршаған ортанының жанашырлары да қала көркіне үлес қосты.

Алматыда қыстың белгісі жоқ. Күн райы ерте көктемді еске салады. Дегемен ақ ұлпа қар мен ақшұнақ аяз болмаса да Жаңа жылдық көңіл күй тамаша. Алматылықтар мен қала қонақтары күн сайын кешкісін Абай алаңындағы бас шыршаның жанынан табылады. Айтпақшы, биіктігі 22 метр болатын бас шаршаны безендіруге шамамен жеті шақырым гирлянда пайдаланылды.

Еңселі шыршалар Астана алаңы мен «Атакент» көрме кешенінде де бой көтерген. Арбат жаяу жүргіншілер аймағы да көз тартар әсемдікке толы. Ертегі кейіпкерлерінің жарық мүсіндері, 2026 жылдың символикасымен безендірілген арт-нысандар, қар ұшқыны, сыйлық, бұғы және жаңа жылдық шарлар пішініндегі сәндік композициялар алыстан көз тартады. Олар қала тұрғындары мен қонақтар үшін әсерлі фотоаймаққа айналды.

Шарипа Мұстабекова, Жетісай тұрғыны:

- Жетісай қаласынан келдім. Атакент қалашығы қандай тамаша етіп жасалған, жарықтандырылған. Түрлі жақсы нәрселерді көріп, қуанып осы жерде қыдырып жүрген жайым бар. Келіп жеткен жаңа жыл құтты жыл болсын, халқым аман болсын!

Жанар Кішкенбаева, Ақтау қаласының тұрғыны:

- Ақтау қаласынан келдім. Қыздарыммен қысқы демалысты Алматыда өткізейік деді. Алматыда Жаңа жылды қарсы алайық деп шештік. Ақтаудан келген қонақпын. Алматы қаласының атмосферасы өте ұнайды. Әрбір жанып тұрған шамдар адамдарға қуаныш, жылулық сыйлайды.

Биылғы жаңа жылда қаланың мерекелік картасы кеңейіп, 13 жаңа орын безендірілді. Олардың қатарында Сайран көлі, «Гүлдер» және «Family» саябақтары, Ганди мен Байсейітова скверлері жарық кескіндемелерімен және тақырыптық шағын сәулет нысандарымен сәнделіп, тұрғындарға үйінің маңында мерекелік көңіл күй сыйлауда.

Абай Оспан, Алматы қаласы Мәдениет басқармасының бөлім басшысы:

- «Жарқыра, жайна Алматы» тұжырымдама қолданылды. Яғни қаланың басты алаңдарын ғана емес, шеткі аудандар бар, 8 ауданның өзінің алаңдары, көшелері безендірілді. Қаланың безендірілуі едәуір барлық бағыты бойынша осы жылы артып отыр. Саны жағынан болсын, сапасы жағынан болсын және іс-шаралар да ауқымды іс шаралар өткізіліп жатыр.

Панфилов көшесіндегі табиғат жанашырларының экошыршалары да назар аудартпай қоймайды. Темір қалбырлар, пластик бөтелкелер, дисктер мен жұмсақ ойыншықтардан жасалған мерекелік инсталяциялар ерекшелігімен көз тартады. Бұл мегаполистің экологиялық мәдениетін арттыруға және тұрмыстық қалдықтарды қайта пайдалану идеясын кеңінен насихаттауға бағытталған.

Авторлары: Гүлжан Көленқызы, Эдуард Кон, Сержан Жұмабаев