Алматыда алғаш рет сауда орталығында кітап беру пункті ашылды

Алматының Жетісу ауданындағы «Adem» сауда орталығында қалалық кітапханалардың кітап беру пункті ашылды,  – деп хабарлайды Aikyn.kz.

Жобаның негізгі мақсаты – қала тұрғындары үшін кітаптың қолжетімділігін арттыру, кітап оқуға қызығушылық қалыптастыру және оқу мәдениетін дамыту.

Іс-шараға белгілі жазушы Нұрдәулет Ақыш, ақын Бақыт Беделхан, айтыскер ақын Серік Қали, ақын Мұратхан Шоқан, Жетісу ауданы әкімінің орынбасары Жанасыл Сабырұлы, мәдениет саласының өкілдері мен қала тұрғындары қатысты.

Жаңа нысанды Жетісу ауданы әкімінің орынбасары Жанасыл Сабырұлы мен жазушы Нұрдәулет Ақыш салтанатты түрде ашты. Бастаманы қолдаған қаламгерлер кітаптарын сыйға тартып, жаңа кітап беру пунктінің қорын құнды туындылармен толықтырды.

Алматы кітапханаларының №14 филиалының меңгерушісі Зарина Айдосқызы бұл бастаманың тұрғындар үшін кітапхана қызметінің қолжетімділігін арттырудағы рөлін атап өтті.

«Жаңа кітап беру пунктінің ашылуы – қолжетімді кітапхана ортасын дамытудағы маңызды қадам. Мұндай кеңістіктер кітапхана қызметінің дәстүрлі формат аясынан шығып, қала тұрғындарының күнделікті өмірінің бір бөлігіне айналуына мүмкіндік береді. Жаңа пункт кітап оқуға қызығушылықты арттыруға, оқу мәдениетін дамытуға және «Оқитын ұлт» қалыптастыруға ықпал етіп, тұрғындар жиі келетін орындардың біріне айналады деп сенемін», – деді Зарина Айдосқызы.

Кітап беру пунктінің ашылуын сауда орталығының кәсіпкерлері де оң бағалады. Кәсіпкер Залинаның айтуынша, мұндай бастама кітапты тұрғындардың күнделікті өмірінің бір бөлігіне айналдыруға мүмкіндік береді.

«Біз үшін дәл осы сауда орталығында кітап беру пунктінің ашылуы жағымды жаңалық болды. Күнделікті тіршілікте кітапханаға арнайы барып, кітап алуға әрдайым мүмкіндік бола бермейді. Енді жұмыс орнынан алысқа бармай-ақ, бос уақытта осында келіп, қажетті кітапты алуға болады. Менің ойымша, бұл осында жұмыс істейтін кәсіпкерлер мен қызметкерлер үшін ғана емес, сауда орталығына келушілер үшін де жақсы мүмкіндік. Кітаптардың қолжетімді бола түсіп, осындай орындарда ұсынылғаны қуантады», – деді ол.

«Adem» сауда орталығының кәсіпкерлері мен келушілері алғашқы күндерден-ақ «Оқитын ұлт» идеясын жүзеге асыруға бағытталған бастаманы қолдап, оған үлкен қызығушылық танытып отыр. Бүгінде аталған кітап беру пунктінің қорында 2 000-нан астам кітап бар. Алдағы уақытта тұрғындарды кеңінен қамту және қала тұрғындары үшін кітаптың қолжетімділігін арттыру мақсатында қаланың өзге аудандарындағы сауда орталықтарында да кітап беру пункттерін ашу жоспарланып отыр.

Жаңа кітап беру пункті сейсенбіден жексенбіге дейін сағат 09:00-ден 18:00-ге дейін жұмыс істейді. Жетісу ауданының тұрғындары мен «Adem» сауда орталығына келушілердің барлығын жаңа кітап беру пунктіне келіп, көңілінен шығатын кітапты таңдап, жаңа туындылармен таныса алады.

Айта кетейік, бүгінде Алматыда барлығы 39 кітапхана жұмыс істейді. Оның 30-ы – қала кітапханасы, 7-еуі тәулік бойы жұмыс істейді. Сонымен қатар қаладағы адам көп жиналатын орындарда өзіне-өзі қызмет көрсететін 32 дербес кітапхана орналасқан.

Сараптама, зерттеу мақала, күнделікті өзекті ақпаратты «Айқынның»   TELEGRAM арнасынан табасыз.