Алматыда ерекше сауда алаңы ашылды

Алматыдағы көпшілікке танымал Көк базарда «Бір ауыл – бір өнім» (БАБӨ) жобасының алғашқы тұрақты сауда нүктесі — Nomad Bazaar ашылды. Мұнда Қазақстанмен қатар Қырғызстан, Өзбекстан, Тәжікстан және Орталық Азияның өзге де елдерінен келген кәсіпкерлер мен қолөнершілердің өнімдері ұсынылған, деп жазады  Egemen.kz..

Жоба «Атамекен» ҰКП мен Жапония халықаралық ынтымақтастық агенттігінің (JICA) қолдауымен жүзеге асып келеді. Бұл бастама ауыл кәсіпкерлерін жергілікті ресурстарды пайдалана отырып, сапалы әрі бәсекеге қабілетті өнім өндіруге ынталандырады.

JICA-мен әріптестік нәтижесінде қазақстандық өндірушілер халықаралық көрмелерге қатысып, өз өнімдерін әлемге танытып жүр. Мәселен, FOODEX Japan көрмесінде қазақстандық «Жантақ» балы әлемнің үздік үш өнімі қатарына енген болатын.

Ашылу рәсімінде сөз алған Гүлия Батырханқызы, «Атамекен» ҰКП Жұмыспен қамту және шағын, әйелдер кәсіпкерлігін дамыту департаментінің басқарушы директоры, жобаның өңірлік кәсіпкерлікті және халықаралық әріптестікті нығайтудағы маңыздылығын атап өтті:

«Бүгінгі шара – тек жаңа сауда орнының ашылуы емес, сонымен бірге өңірлік ынтымақтастықтың көрінісі. Бұл алаңда Орталық Азия елдерінің өндірушілері бас қосып, өз өнімдерін ұсынуда. Алдағы уақытта JICA серіктестігімен осындай жобаларды кеңейту жоспарда бар», – деді ол.

JICA OVOP (БАБӨ) халықаралық жобасының серіктесі Кендзи Накамура да бұл бастаманың аймақ үшін үлкен мүмкіндік екенін айтты:  «Қазақстанда алғашқы тұрақты БАБӨ алаңының ашылуы – маңызды қадам. Бұл жоба жергілікті қауымдастықтардың дамуына, жаңа жұмыс орындарының құрылуына және өңірлік өнімдердің халықаралық нарыққа шығуына жол ашады», – деді Накамура мырза.

Nomad Bazaar бүгінде Қазақстан мен Орталық Азияның түкпір-түкпірінен келген өндірушілер мен қолөнершілердің өнімдерін бір шаңырақ астында біріктіріп отыр. Жоба алдағы уақытта да кеңейіп, жаңа серіктестіктер мен мүмкіндіктерге жол ашуды мақсат етеді.