Алматыда шағын бизнестің салығы 3% ға дейін төмендетілді

Алматы қаласы мәслихатының депутаттары шағын бизнеске арналған жаңа арнайы салық режимі (АСР) бойынша мөлшерлемені 3%-ға дейін төмендету туралы ұсынысты қолдады. Бұл шешім 2026 жылы күшіне енетін жаңа Салық кодексі аясында қабылданып отыр. Кодекске сай базалық мөлшерлеме 4% болып белгіленген. Десе де өңірлерге оны 2–6 пайыз аралығында реттеу құқығы берілген, деп жазады Egemen.kz.

Фото: freepik.com

Алматы қаласы Кәсіпкерлік және инвестициялар басқармасының басшысы Берікбол Мәндібаевтың айтуынша, мөлшерлемені 3% деңгейінде сақтау кәсіпкерлерге түсетін қосымша жүктемені азайтады. 

Бүгінде Алматыдағы шағын бизнес субъектілерінің басым бөлігі 3% мөлшерлемемен қолданыстағы жеңілдетілген режимде жұмыс істейді. Егер мөлшерлеме артса, компаниялардың қаржылық тұрақтылығына теріс әсер етуі ықтимал.

Салық саласындағы өзгерістердің бірі – B2C сегменті. Бұл санатқа үй маңындағы дүкендер, қызмет көрсету орталықтары, сұлулық салондары, жөндеу шеберханалары және халыққа бағытталған өзге де кәсіпорындар енеді. Жаңа талаптарға сәйкес, жалпыға бірдей тәртіппен жұмыс істейтін бизнес АСР қолданатын компаниялардан алынған тауарлар мен қызметтерді шығыс ретінде есептемейді. Бұл серіктестік тізбектерінің қысқаруына әкелуі мүмкін. Сондықтан мөлшерлемені 3% деңгейінде сақтау шешімі Алматының шағын және микробизнесінің бәсекеге қабілеттілігін қорғауға бағытталған.

Депутаттар бастаманы қолдай отырып, салық мөлшерлемесін төмендету қала бюджетінің кіріс бөлігіне ықпал етуі мүмкін екенін атап өтті.

Өз кезегінде Алматы қаласы әкімінің орынбасары Олжас Смағұлов бұл мәселе депутаттармен, бизнес қауымдастығымен және Мемлекеттік кірістер департаментімен егжей-тегжейлі талқыланғанын айтты.

«Біздің міндетіміз – салық базасын кеңейту, кәсіпкерлік белсенділікті қолдау. Барлық тәуекел ескерілгеннен кейін мөлшерлемені 3%-ға дейін төмендету ұсынысы енгізілді. Бұл – 200 мың алматылық кәсіпкердің тағдырына қатысты мәселе. Бюджет шығындары бойынша тәуекелдердің өтелетініне сенімдіміз. Қабылданған шешім бизнестің көлеңкеден шығуына, кәсіпкерліктің жандануына және компаниялардың басқа өңірлерге тіркелуінің алдын алуға ықпал етеді. Жалпы алғанда, бір жыл ішінде салық базасының азаймай, керісінше ұлғаюын күтеміз. Сонымен қатар келесі жылы республикалық бюджетке 490 млрд теңге көлемінде қомақты қаражат беру жоспарланған (биыл – 250 млрд). Соған қарамастан, біз алматылық кәсіпкерлерді қолдау жөнінде шешім қабылдадық», деді қала әкімінің орынбасары Олжас Смағұлов.