Алматыдағы айыппұл тұрағында бір апта үшін 150 мың теңгеден астам тарифтерді кім бекітті және қаражат қайда кетеді

Осы жылдың 4 қазанынан бастап Алматыда автомобильдерді эвакуациялау және айып тұрақтарында сақтау тарифтері күшіне енді. Осылайша, көлік иелеріне эвакуация үшін 3 АЕК (12 975 теңге) және айып тұрағында сақтаудың алғашқы тәулігі үшін 2,5 АЕК (10 812,5 теңге) төлеуге тура келеді, ал бұл сомаға кейінгі әрбір сақталған тәулік үшін 5 АЕК (21 625 теңге) қосылып отырады.

Есептеулер бойынша, заң бұзғаны үшін көлігі алынған иелері алғашқы тәулікке айыппұлды есептемегенде 23 787,5 теңге төлеуі тиіс, өйткені айыппұл бөлек төленеді және оның көлемі құқық бұзушылықтың ауырлығына байланысты әртүрлі болуы мүмкін. Егер көлік иесі ауырып қалуына немесе іссапарға кетуіне байланысты көлігін бір апта бойы алып кете алмаса, бұл сомаға күн сайын 5 АЕК қосылады. Бастапқы сомаға тағы 129 750 теңге қосылып, нәтижесінде айып тұрағында бір апта тұру және эвакуация ақысы 153 537,5 теңгені құрайды.

Мұндай сома көптеген жүргізуші үшін ауыр тиюі мүмкін, бұл айып тұрақтарында көліктердің қалып қоюына әкеп соғуы ықтимал. Tengri Auto редакциясы Жол қозғалысын ұйымдастыру және жолаушылар көлігі басқармасынан тарифтердің құнын кім белгілегенін, қала тұрғындары мен қонақтарының қаржылық мүмкіндіктері және көлікті сақтау ақысын төлей алмау салдарынан айып тұрақтарында туындауы мүмкін кептелістер ескерілді ме деген сұрақтарға жауап алуды жөн көрді.

Редакция жол қозғалысы ережелерін бұзуды ақтамайды және әрбір заңбұзушылық үшін заңға сәйкес жаза қарастырылуы тиіс деп санайды. Материал тарифтердің енгізілуі көлік иелерінің өміріне және Алматы қаласындағы айып тұрақтарындағы жағдайға қалай әсер ететінін түсіну мақсатында дайындалды.

Тарифтер не үшін қажет?

Басқармаданың түсіндіруінше, бұған дейін ұсталған көлік құралдарын эвакуациялауды жол-патрульдік полиция қызметкерлері көлік иелері үшін тегін жүзеге асырған, ал арнайы тұрақтарды ұстау қалалық бюджет есебінен қамтамасыз етілген.

"Тарифтер мамандандырылған техниканы пайдалану шығындарын, қызметкерлердің еңбекақысын, арнайы тұрақтарды күтіп ұстау және күзету шығындарын ескере отырып, экономикалық есептеулер негізінде қалыптастырылды", - деп атап өтті ведомство.

Басқарманың хабарлауынша, көліктер айып тұрақтарында жиналып қалмауы үшін алғашқы тәулікке 50 пайыздық жеңілдікпен, ал кейінгі тәуліктерге толық төлеммен сараланған тариф белгіленген.

Сонымен қатар Алматы қаласындағы жол қозғалысын ұйымдастырудың жол қозғалысы ережелерімен реттелмеген бөлігіне сәйкес, көлікті эвакуацияланған күні сағат 18:00-ге дейін алған жағдайда сақтау ақысы есептелмейді.

Қарапайым тілмен айтқанда, тарифтер жүргізушілер берешек жинақтамай, көлікті бірінші тәулікте алып кетуге тырысатындай етіп жасалған. Бұл көліктердің тұрақтап қалмай, айналымда болуын қамтамасыз етуі тиіс.

"Сонымен қатар тұрақтарда ұзақ уақыт бойы тұрған көлік иелерін анықтау және оларға көлік құралдарын алып кету қажеттілігі туралы хабарлау жұмыстары жүргізіліп жатыр", - деп хабарлады басқарма.

Тарифтердің құнын кім белгіледі?

Басқарманың мәлімдеуінше, "Жол қозғалысы туралы" заңға өзгерістер енгізіліп, ол Астана және Алматы қалаларының мәслихаттарына коммуналдық меншіктегі арнайы тұрақтарда көлік құралдарын эвакуациялау және уақытша сақтау үшін төлем мөлшерін айқындау бойынша өкілеттіктер береді.

"Осылайша, көлік құралдарын эвакуациялау мен сақтауды ақылы негізде жүзеге асыру мүмкіндігі заңнамада қарастырылған, ал төлемнің нақты мөлшерін белгілеу жергілікті өкілді органдардың құзыретіне жатқызылған", - деді ведомство өкілдері.

Аталған заңнамалық нормаларды орындау мақсатында Алматы қаласының мәслихаты ӘҚБтК-де көзделген негіздер бойынша көлік құралдары ұсталған жағдайларда қолданылатын тиісті тарифтерді бекітті.

Айып тұрақтарынан түскен қаражат неге жұмсалады?

Басқарманың түсіндіруінше, қаражат эвакуация жүйесі мен арнайы тұрақтардың қызметін қамтамасыз етуге, соның ішінде мамандандырылған техниканы күтіп ұстау мен техникалық қызмет көрсетуге, жұмысшылардың еңбекақысына, аумақтарды күзету мен күтіп ұстауға бағытталады.

Жеңілдіктер бар ма?

Ведомствоның хабарлауынша, қолданыстағы шешімде көлік иесінің әлеуметтік мәртебесіне байланысты жекелеген жеңілдіктер беру қарастырылмаған.

"Автокөлікті ұстау және арнайы тұраққа жеткізу ӘҚБтК-де көзделген әкімшілік құқық бұзушылық туралы іс бойынша іс жүргізуді қамтамасыз ету шарасы екенін, ал жол қозғалысы қауіпсіздігі талаптары барлық қатысушылар үшін міндетті екенін ескеру қажет", - деп хабарлады басқарма.

Көлігін алып кете алмайтын жүргізушілер не істеуі керек?

Сондай-ақ бізді жүргізуші денсаулығына байланысты, ақшасының жоқтығынан немесе іссапарда болуы себепті көлігін алып кете алмаса не болатыны қызықтырды. Жауап ретінде қолданыстағы шешімде бұл себептер бойынша сақтау ақысынан босату қарастырылмағаны айтылды.

Ақы ұсталған көлік құралының арнайы тұрақта болған кезеңі үшін белгіленген тарифтерге сәйкес есептеледі.

Төлем құны қалай есептеледі?

Төлем мөлшері көлік құралының санаты мен оны сақтау ұзақтығына байланысты есептеледі. Тәулік көлік құралын арнайы тұраққа қабылдау-тапсыру актісінде көрсетілген күн мен уақыттан бастап 24 сағат ретінде есептеледі.

Фото: Almaty Parking. Эвакуациялау ақысының мөлшері

Сақтау үшін жиынтық төлемнің ең жоғары мөлшері қолданыстағы шешіммен белгіленбеген.

Алматының айып тұрақтарында қанша орын бар?

Бізге Алматыда 1500-ден астам көлікке арналған "Көкжиек" және "Бухтарминская" коммуналдық арнайы тұрақтары жұмыс істейтіні хабарланды.

Басқарма тұрақтардың толып қалуының бір себебі - иелері алып кетуге келмейтін жекелеген көлік құралдарының ұзақ уақыт бойы тұруы екенін мойындады.

"Қазіргі уақытта ұсталған көлік құралдарын одан ары орналастыру мүмкіндігін қамтамасыз ету үшін осындай автомобильдер иеленіп тұрған орындарды босату жұмыстары жүргізіліп жатыр", - деп бөлісті басқармадағылар.

Автомобильдерді айып тұрақтарынан неге алып кетпейді?

Басқарма қазіргі уақытта арнайы тұрақтарда ұзақ уақыт тұрған көлік иелерін анықтау және оларға автомобильдерін алып кету қажеттілігі туралы ақпараттандыру жұмыстары жүріп жатқанын хабарлады.

"Мұндай көліктердің арасында жол-көлік оқиғалары салдарынан қатты зақымданып, іс жүзінде бұдан былай пайдалануға жарамсыз болып қалған автомобильдер бар. Кей жағдайларда иелері оларды алудан бас тартады", - деп түсіндірді ведомство өкілдері.

Қазіргі уақытта заңнамаға сәйкес талап етілмеген көлік құралдарына қатысты мәселелерді одан ары шешудің құқықтық механизмі әзірленіп жатыр.

Тағы оқыңыз: Алматыда автотұрақтар қымбаттайды: бірыңғай тарифтің орнына үш жаңа тариф енгізілмек

Бізді Google-дың негізгі дереккөздер тізіміне қосыңыз

Қосу