21 пәтер, қонақүй және автомобильдер: Қазақстанда ломбардтар желісінің жолы кесілді

Қаржылық мониторинг агенттігінің Алматы облысы бойынша департаменті "Альби" ломбардтар желісінің заңсыз қызметінің жолын кесті. Ведомствоның баспасөз қызметі оқиғаның мән-жайын жариялады, деп хабарлайды Tengrinews.kz.

Тергеу мәліметтері бойынша, бұған дейін "Альби-Ломбард" ЖШС микроқаржылық қызметті жүзеге асыратын ұйымдар тізілімінен шығарылған, соған байланысты ломбардтық қызметпен айналысу құқығынан айырылған.

"Алайда атауын "Альби-КМ" ЖШС деп өзгерткеннен кейін компания Алматы және Түркістан облыстарының аумағында зергерлік бұйымдар кепілімен іс жүзінде қарыз беруді жалғастыра берген. Ломбардтар желісі негізінен базарлар мен сауда үйлерінің маңында орналасқан. Клиенттерді тарту үшін кепілді жоғары бағалау және несие тарихына әсер етпеу туралы уәделер берілген жарнамалар қолданылған", - деп хабарлады ҚМА.

Қарыздар күніне 2 пайызбен берілгені нақтыланды, бұл заңнамада белгіленген 0,3 пайыздық шекті мөлшерлемеден алты еседен астам артық.

"Бұл ретте келісімшарттар бұрынғы "Альби-Ломбард" ЖШС мөрлері басылған кепіл билеттері арқылы рәсімделген, ал есеп айырысулар қолма-қол ақшамен және бақылаудағы жеке кәсіпкерлердің банктік шоттары арқылы жүргізілген. Қылмыстық табыс 146 миллион теңгеден асты", - деп мәлімдеді ведомство өкілдері.

Күдіктіге қатысты ешқайда кетпеу және тиісті мінез-құлық туралы қолхат түріндегі бұлтартпау шарасы таңдалды.

Сот санкциясымен оның мүлкіне, соның ішінде 21 пәтерге, 5 жер учаскесіне, 7 автокөлікке, 7 гаражға, 2 дүкенге және қонақүйге тыйым салынды.

Қылмыстық іс сотқа жолданды. Қаржылық мониторинг агенттігінің нақтылауынша, Қылмыстық-процестік кодекстің 201-бабына сәйкес өзге ақпарат жария етуге жатпайды.

Бұған дейін Қостанай облысының екі тұрғыны лицензиясыз заңсыз микроқаржылық қызметпен айналысқаны және қылмыстық табысты заңдастырғаны үшін сотталғаны хабарланған болатын. Екі жыл ішінде "кәсіпкерлердің" қызметін 1600-ден астам азамат пайдаланған, ал заңсыз қызметтен түскен табыс 579 миллион теңгеден асқан. Сот оларға мүлкін, соның ішінде бес пәтерін, үш автокөлігін және екі жер учаскесін тәркілеумен бірге екі жылға бас бостандығынан айыру жазасын кесті.

Бізді Google-дың негізгі дереккөздер тізіміне қосыңыз