Қазақстанда аутизмі бар балаларға арналған 189 жаңа орталық ашылады: медициналық көмек жақындап келеді

Қазақстанда психикалық денсаулықты қорғау ұйымдарының желісін едәуір кеңейту жоспарланып отыр. Елде 81 алғашқы медициналық орталық пен аутизмі бар балаларға арналған 189 күндізгі болу бөлімшесі ашылады. Бұл шалғай аудандардың тұрғындарына да ерте диагностикадан өтуге, емделуге және оңалту қызметтерін алуға мүмкіндік береді.

2027–2031 жылдарға арналған Кешенді жоспар аясындағы жаңашылдықтар туралы Денсаулық сақтау министрлігінің Медициналық көмекті ұйымдастыру департаментінің директоры Гүлнар Сәрсенбаева мәлімдеді.

Денсаулық сақтау министрлігі аутизм спектрінің бұзылыстары (АСБ) бар балаларды қолдауға ерекше назар аударып отыр.

Жаңадан ашылатын 189 күндізгі болу бөлімшесі қолданыстағы психикалық денсаулық орталықтары мен аудандық ауруханалардың базасында жұмыс істейді. Мұндай тәсіл балаларға тәулік бойы ауруханаға жатқызылмай-ақ, тұрғылықты жері бойынша толыққанды оңалту курсынан өтуге мүмкіндік береді.

Қазіргі уақытта елімізде 20 өңірлік орталық, 101 алғашқы медициналық орталық және бейінді 212 кабинет жұмыс істейді. Қосымша 81 орталыққа деген қажеттілік 12 облыста анықталған.

«Бүгінде психикалық денсаулық мәселелері алдыңғы қатарға шығып отыр. Біздің міндетіміз — пациенттің тұрғылықты жеріне қарамастан, барлық өңірде мамандандырылған медициналық көмектің қолжетімділігін қамтамасыз ету», — деп атап өтті Денсаулық сақтау министрі Ақмарал Әлназарова.

Денсаулық сақтау министрлігінің басшысы балалар мен ересектер психиатрларының тапшылығы мәселесін де шешуді тапсырды. Осы мақсатта өңірлерге бейінді мамандар даярлауға арналған білім беру гранттарының санын көбейту және медицина қызметкерлеріне әлеуметтік қолдау шараларын енгізу міндеттеледі.

Кадр мәселесінен бөлек, Кешенді жоспар ғимараттарды жаңғыртуды, заманауи жабдықтар сатып алуды, амбулаториялық медициналық көмекті дамытуды және дәрі-дәрмекпен тегін қамтамасыз ету жүйесін жетілдіруді көздейді.

Бүгін, 11:35