Алматыдағы блэкаут әуежайда не болып жатыр

14 тамыз күні күндіз Алматыда электр энергиясы апатты жағдайда өшіп қалды. Жарықтың сөнуі қаланың бірнеше ауданында, сондай-ақ Алматы облысында байқалды. Электр қуатының жоқтығынан тұрғындар қалалық инфрақұрылымның, соның ішінде әуежай жұмысындағы қиындықтар туралы хабарлап жатыр, деп жазады Tengri Travel.

Алматы әуежайындағы рейстердің жағдайы қандай?

Жарықтың өшуіне байланысты оқырмандар Алматы әуежайында да электр қуатының жоғалғанын хабарлап жатыр.

Біз әуежай әкімшілігінен электрмен жабдықтау мәселесі жұмысқа қалай әсер еткені және ұшу мен қону кестесінде өзгерістер бар-жоғы туралы түсініктеме сұрадық. Жарияланым шыққан сәтте әуежай тарапынан жауап берілмеді.

Онлайн-табло мәліметтеріне сәйкес, Петропавл, Мәскеу, Анталья және Гуанчжоудан келетін рейстер кешігуде.

Скриншот: Алматы әуежайының онлайн-таблосы, келетін рейстер

Ақтау, Мәскеу және Сеул бағытына ұшатын рейстер де кешіктірілуі мүмкін.

Скриншот: Алматы әуежайының онлайн-таблосы, ұшатын рейстер

Бұл ретте бүгін Алматыдан ұшуы тиіс жолаушылар қаладағы жағдайды ескергені жөн: бағдаршамдардың істен шығуына байланысты жолдарда кептеліс пайда болуда, сондықтан әуежайға жету әдеттегіден көп уақыт алуы мүмкін.

Не болды

"Алатау Жарық Компаниясы" АҚ мәліметінше, апаттық үзіліс 14 тамыз күні сағат 14:38-де орын алған. Бұған «KEGOC» АҚ-на тиесілі 500 кВ әуе электр беру желілерінің ажырауы себеп болды.

"Л-5400, Л-5300 және Л-5320 желілерінің апаттық ажырауы салдарынан компания желілерінде апатқа қарсы автоматика іске қосылды", — деп хабарлады "Алатау Жарық Компаниясы" АҚ.

Осыған байланысты Алматы қаласы мен Алматы облысындағы тұтынушылар жарықсыз қалды. Ажыратылған жүктеме көлемі 300 МВт құрады.

Алматының қай жерлерінде жарық жоқ

Алматының төрт ауданында электр қуатының өшкені хабарланды:

Бостандық; Наурызбай; Әуезов; Алатау.

Сонымен қатар, қаланың өзге де аудандары мен қала маңындағы елді мекендердің тұрғындарынан электр энергиясының жоқтығы туралы ақпарат түсуде.

Компания мамандары тұтынушыларды электрмен жабдықтауды қалпына келтіру үшін қажетті шараларды жүргізіп жатқанын хабарлады.

Жарықтың өшуі Алматы облысының бірқатар аудандарына да әсер етті. Жамбыл, Балқаш, Есік, Қарасай, Шелек, Райымбек, Ұйғыр, Іле, Кеген және Талғар аудандарының тұтынушылары электр қуатынсыз қалды.

Қалада бағдаршамдар істемей тұр, кептелістер пайда болды

Электр энергиясының үзілуі қалалық инфрақұрылым жұмысына да әсер етті. Тұрғындар кей жерлерде бағдаршамдардың істен шыққанын айтуда.

Көшелерде бірден кептеліс түзіле бастады. Кейбір қиылыстарда қозғалысты қолмен реттейтін реттеушілер пайда болды.

Бұдан бөлек, тұрғындар байланыс сапасының нашарлағаны туралы хабарлауда.

Куәгерлер жазып жатқан тағы бір мәселе — метро жұмысының тоқтауы. Олардың айтуынша, пойыздарға өту жабылған.

Тағы оқыңыз: Істемей тұрған бағдаршамдар мен байланыс үзілістері — жарық өшкеннен кейін Алматыда не болып жатыр

Google News арқылы жаңалықтарымызды қадағалаңыз

Жазылу