Алматыдағы көлік қозғалысын Қытайдағыдай ету ұсынылды

Қазақстанның экология министрі Ерлан Нысанбаев қалалардағы автомобильдер қозғалысын мемлекеттік нөмірлердің соңғы цифрларына байланысты жұп және тақ күндері бойынша шектеу туралы ұсынысқа түсініктеме берді, деп хабарлайды Arasha.kz.

Экология министрлігінің басшысы Бейжіңдегі мұндай тәжірибе ауаның ластануымен күресте жоғары тиімділік көрсеткенін түсіндірді. Бұл жүйе, ең алдымен, Алматы қаласына енгізілуі мүмкін.

«Бүгінде Алматыда 748 мың автомобиль тіркелген. Оған қоса күн сайын шамамен 400 мың машинаның кіретіні тіркеледі. Жағдайға кеңірек қарасақ, іс жүзінде бүкіл қала маңындағы халық Алматыда жұмыс істейді, жолаушылар тасымалы мен такси қызметі жүзеге асырылады. Сондықтан көлік қозғалысын реттеу шаралары басқа шешімдермен кешенді түрде экологиялық жағдайды жақсартуға ықпал етуі мүмкін», ‒ деді ҚР Экология және табиғи ресурстар министрі Ерлан Нысанбаев.

Қазақстанның оңтүстік-шығыс көршісінде бұл жүйенің қалай жұмыс істейтінін осы жылдың басында Экология министрлігінің мамандар тобы барып зерттеген. Қазақстандық сарапшылар Қытайға іссапармен барып қайтты. Сонымен, Бейжіңде нөмірі жұп сандармен аяқталатын көліктер айдың жұп күндері қаланың орталық аудандарымен жүре алмайды, тақ нөмірлі көліктер үшін де солай.

Ережені бұзғандарды көше камералары тіркеп, жүргізушілерге айыппұл салынады. Қазақстандық мегаполистерде қозғалыс нақты қалай шектелетінін экология министрі әзірге дәл айта алмайды.

Нысанбаевтың айтуынша, реттеудің ықтимал механизмдері әр қаланың ерекшеліктері мен көлік жүктемесі ескеріле отырып, бөлек қарастырылуы тиіс.