Алматыдағы самокаттар хаосын жаңа ережелермен шектейді

Алматыда электрсамокаттар, мопедтер мен электрлік велосипедтерге арналған тұрақ ережелерін белгілейтін жол қозғалысын ұйымдастырудың жаңартылған жобасы дайындалды, деп хабарлайды Tengrinews.kz.

Мәслихат отырысында жобаның егжей-тегжейін Жол қозғалысын ұйымдастыру және жолаушылар көлігі басқармасының басшысы Ержан Диханбаев таныстырды.

Оның айтуынша, құжатта электрсамокаттар, мопедтер және басқа да жеке мобильділік құралдарына арналған тұрақтарды орналастыруға қойылатын бірыңғай талаптар қарастырылған.

"Жалға беру операторлары үшін тұрақтар келісімшарт негізінде ұйымдастырылады, бұл қаладағы көліктерді орналастыруды ретке келтіруге мүмкіндік береді. Сонымен қатар тұрғындар бұл тұрақ аймақтарын өздерінің жеке самокаттары мен басқа да жеке мобильділік құралдары үшін тегін пайдалана алады", - деді Диханбаев.

Бұдан бөлек, құжат көлік құралдарын эвакуациялау мен сақтаудың бірыңғай ережелерін, сондай-ақ аулаларда шлагбаумдар мен қоршауларды орнату тәртібін белгілейді.

Басқарма бұл жоба жол қозғалысын жүйелеуге, қала инфрақұрылымын тиімдірек пайдалануға және көліктің жаңа түрлері үшін бірыңғай ережелер орнатуға көмектеседі деп есептейді.

Бұған дейін Алматыда электрсамокаттарға арналған бірыңғай тұрақ жүйесі іске қосылды. Барлық кикшеринг сервистері үшін тұрақты ретке келтіру және тротуарларда бей-берекет қалдырылған самокаттардан арылу мақсатында тұрақ аймақтарының ортақ картасы әзірленді.

Еске сала кетейік, 25 тамыздан бастап Алматыда электр самокатын пайдаланушылар үшін жаңа ережелер күшіне енеді.

Енді жалға беруші компаниялар самокаттарды тіркеуге, оларға сәйкестендіру нөмірлерін орнатуға, сақтандыруды рәсімдеуге, көліктің техникалық жағдайын бақылауға және арнайы тұрақ орындарын ұйымдастыруға міндетті.

Сондай-ақ операторлар пайдаланушының жеке басын және оның жүргізуші куәлігінің бар-жоғын тексеруі тиіс.

Google News арқылы жаңалықтарымызды қадағалаңыз