Алматыдағы заңсыз автожарыстар: үш күнде 5 мыңнан астам құқық бұзушылық тіркелді

Алматы көшелеріндегі заңсыз автожарыстар мен жол ережесін өрескел бұзу деректері құқық қорғау органдарын алаңдатып отыр.
Алматы қаласының полиция департаменті мәліметінше, қаладағы жол қауіпсіздігін күшейту мақсатында жүргізілген рейдтер нәтижесінде небәрі үш тәуліктің ішінде 5 мыңнан астам құқық бұзушылық тіркелген.

Тексеру барысында мас күйінде көлік тізгіндеген 43 жүргізуші ұсталып, олардың барлығы жүргізуші куәлігінен айырылды. Сонымен қатар, 369 азаматтың көлікті тиісті құжаттарсыз басқарғаны анықталып, 94 автокөлік арнайы айып тұрағына қойылған.

Полиция өкілдерінің айтуынша, қауіпті жүргізу, әсіресе түнгі уақытта ұйымдастырылатын заңсыз жарыстар жиі кездеседі. Үш күн ішінде жылдамдықты шамадан тыс арттырудың 2 мыңнан астам дерегі тіркелген. Кейбір жүргізушілердің өз құқық бұзушылықтарын әдейі бейнежазбаға түсіріп, әлеуметтік желілерде жариялауы да жағдайды күрделендіре түсуде. Дегенмен, тәртіп сақшылары мұндай әрекеттердің барлығы бақылауда екенін және кінәлілер заң аясында жауапқа тартылатынын атап өтті.

Осындай өрескел оқиғалардың бірі Әл-Фараби даңғылы бойында орын алған. Жүргізуші көлігін сағатына 250 шақырымға дейін үдеткен. Қауіпті әрекеті үшін ол жедел түрде ұсталып, сот шешімімен 10 тәулікке әкімшілік қамауға алынды.

Жалпы, полиция қала тұрғындарын жол қозғалысы ережелерін қатаң сақтауға шақырып отыр. Себебі бір сәттік жауапсыздық адам өміріне қауіп төндіруі мүмкін.