Алматының туристік әлеуеті Лондонда таныстырылды

Алматы қаласы 4-6 қараша аралығында ExCeL London кешенінде өткен World Travel Market (WTM) London 2025 халықаралық туристік көрмесінде Қазақстанның туристік әлеуетін таныстырды, деп жазады Egemen.kz.

Бұл туризм индустриясындағы ең ірі оқиғалардың бірі, онда жыл сайын түрлі ел мен компания өкілдері бас қосады.

Алматының көрмеге қатысуы қаланы Орталық Азияның заманауи, қауіпсіз әрі шабыт беретін туристік бағыты ретінде танытуға бағытталды. Қала өзін Іле Алатау тау сілемдеріне бастайтын қақпа ғана емес, мәдениет, гастрономия және оқиғалық туризм орталығы ретінде көрсетуді көздеген.

2025 жылдың алғашқы алты айында қалаға 1,14 миллионнан астам турист келген. Оның ішінде 320 мыңнан көбі – шетелдік қонақтар. Әсіресе, Ұлыбританиядан келушілер саны 16%-дан асқан.

«WTM London – Алматыны әлемге жаңа қырынан шығыс дәстүрі мен мегаполис ырғағы тоғысқан қала ретінде таныстыруға мүмкіндік береді. Біз Алматының жылылық, табиғат және шабыт символына айналғанын қалаймыз», – деп мәлімдеді қаланың Туризм басқармасы.

Алматының көрме стендінде Лондондықтар қала мәдениеті мен рухын сезінді: домбыра мен қобыздың әуені шырқалып, қазақ батырлары өнер көрсетті, қонақтар қазы, бауырсақ, жент және қымыз сияқты ұлттық тағамдардың дәмін татты.

Сонымен қатар көрме халықаралық туроператорлармен, әуе компаниялармен және медиа өкілдерімен жаңа іскерлік байланыс орнатуға арналған алаң болды. Әсіресе, тұрақты туризмге және MICE-туризмге (іскерлік іс-шаралар туризмі) дамытуға, сондай-ақ Алматыны саяхатшылар үшін барынша жайлы ететін инфрақұрылымдық жобаларға баса назар аударылды.