Лондонда Қазақстанның инвестициялық мүмкіндіктері таныстырылды

Лондонда өткен халықаралық «Тұрақты болашақ» форумында Қазақстан өзінің инвестициялық стратегиясын және негізгі экономикалық басымдықтарын таныстырды.

Делегация өкілдері еліміздің әріптестікке ашық, тұрақты әрі қауіпсіз болашақты бірге құруға дайын екенін атап өтті. Қазақстандық делегация құрамында Сыртқы істер, Энергетика министрліктері, Ұлттық геологиялық қызмет, «Астана» халықаралық қаржы орталығы және басқа да ұйымдардың өкілдері бар. Арнайы панельдік сессияда олар Қазақстанның тұрақты дамуға, ашықтық пен сенімге негізделген экономика құруға бағыт алғанын айтты.

Әлібек Қуантыров, ҚР Сыртқы істер министрінің орынбасары:

- Сессияда Қазақстанда қандай мүмкіндіктер барын және қалай біз оларды пайдаланып жатырмыз, сол туралы айттық. Сонымен қатар оңай емес уақыттарда біз қалай инвестицияларды тартамыз? Сол себепті осы форум өте пайдалы болды деп есептеймін.

Форум мақсаттарының бірі энергетика саласындағы жаһандық өзгерістерді ой талқысына салу. Қазақстан өзін дәстүрлі және «жасыл» энергия көздерін тиімді үйлестіре алатын, энергетикалық балансы тұрақты мемлекет ретінде танытып келеді. Әлемдік тұрақсыздық жағдайында еліміз аймақтың және Еуропаның энергетикалық қауіпсіздігін қамтамасыз етуде маңызды рөл атқара алатынын дәлелдеді. Қазірдің өзінде Қазақстанның энергия тасымалдаушылары Еуропа нарығының 15 пайыздан астам қажеттілігін өтеп отыр.

Санжар Жаркешов, ҚР Энергетика вице-министрі:

- Future resilience форумында біз өзіміздің үлгімізді айтып жатырмыз. Бізде энергоресурстар көп. Әсіресе жаңадан қазіргі уақыттағы атом электр станциялары туралы сөз қозғалды және де көптеген мұнай-газ саласындағы мегажобалар туралы қозғалды.

Форум қатысушылары қазақстандық делегацияның мазмұнды әңгімесін ұйып тыңдап, іскерлік ұстанымын, стратегиялық көзқарасын және ынтымақтастыққа ашықтығын жоғары бағалады. Бұл алаң пікір алмасу үшін ғана емес, жаңа серіктестіктер орнатуға да көп мүмкіндік берді.

Aйо Отуяло, Prime Atlantic компаниясының басшысы:

- Мен қазақстандық делегацияның кәсібилігіне тәнті болдым. Елдің бизнеске ашық екендігі анық байқалады. Біз әріптестік орнатуға мүдделіміз және өз басым келесі жылы Қазақстанға баруды жоспарлап отырмын.

Форумда ұсынылған бастамалар Қазақстанның «жасыл» энергетика және технологиялық инновациялар жолында нық қадам жасағанын әрі әлемдік инвесторлардың елімізге деген сенімі артқанын көрсетті.

Авторы: Ғалымжан Қараманұлы