Лондонда Қара шекпен спектаклі сахналанды

Қазақ театры Лондонда өнер көрсетті. Режиссер Асхат Маемировтың «Қара шекпен» атты спектаклі қазақша қойылып, шетелдіктер аудармасын ағылшын тіліндегі субтитр арқылы оқыды.

«Қара шекпен» – махаббат, адалдық, опасыздық пен ар-ождан туралы астары терең туынды. Автор спектакль арқылы бүгінгі қоғамның шынайы бейнесін көрсетуге тырысқан. Кейіпкерлердің барлығы аң-құс, адам кейпінде жүрген малшы ғана. Ол өзіне адал қызмет еткен ит – Тұзардың еңбегін бағаламай, тек «жұмыс құралы» ретінде ғана көреді. «Өмірде де жиі солай болып жатады», – дейді спектакль авторлары. Басты рөлдердің бірін Қазақстанның халық әртісі Лидия Каденова сомдады.

Лидия Каденова, ҚР халық әртісі:

- Мен өзім қоян ананы ойнадым. Менің жасыма қарап, олай жүгіреді деп ойламайтын шығар. Бәрі келіп айтып жатыр. «Сондай сүйікті қоян болып қалдыңыз», – деді ғой маған.

Жалпы бұл Лондонға өз қаражатымен келіп, өнер көрсетіп отырған алғашқы жеке қазақ театры және оның тырнақалды жұмысы. Қолдаушысы да, демеушісі де өздері. Жобаның бастапқы кезде өзін-өзі ақтамайтыны анық. Қазіргі мақсат – жергілікті көрерменнің талғамын зерттеп, болашақта сұраныс болатынына көз жеткізу.

Ақкенже Әлімжан, The Arts Stage театрының көркемдік жетекшісі:

- The Arts Stage деген театр құрылды. Оның миссиясы – шетелде, Еуропада, Британияда қазақ театрын таныстыру. Қазақ театры актерларының, жалпы актерлардың кәсіби шеберлігін көрсету.  

Шынаргүл Қабышева, The Arts Stage театрының продюсері:

- Осында біздің бауырластарымыз, қандастарымыз өте көп. Қазақ халқы, бүгін көрдіңіздер, өте тамаша, риза болды. Сонымен қатар өте көп шетелдік те болды.

Көрермендердің 30%-і шетелдіктер болды. Олар қазақша түсінбесе де, жоғарыда ілулі тұрған экран арқылы тәржімасын оқып, ұғып отырды. Кәсіби актерлердің шеберлігіне тәнті болғаны соншалық, кейде аударманың қажеті де болмады. Өнерді ерекше қадірлейтін халық спектакльді шын жүрегімен қабылдады.

Сара Шоу, көрермен:

- Жануарларды кейіпкер ретінде көру мен үшін үйреншікті нәрсе емес. Екіншіден, шынымен де өте тартымды қойылым болды. Актерлер қоян, ит, қарға, қасқыр кейпіне еніп, тамаша ойнады.

Майкл Эсторик, көрермен:

- Меніңше, Лондонда мұндай спектакльдердің қойылуы өте маңызды. Өйткені бұл біз біле бермейтін басқа мәдениет туралы хабар береді. 

Спектакльдің соңы шағын концертке ұласты. Қазақстандық өнер майталмандары жанды дауыста ұлттық әндерімізді орындап, бай мәдениетімізді танытты. Сондай-ақ аққудың табиғи сұлулығын, қасиетін, нәзіктігін би пластикасы арқылы жеткізді. Қыз ұзату рәсімін де көрсетіп, ұлттық хореографияның терең мәнін аша білді.

Авторы: Ғалымжан Қараманұлы