Ташкентте Хан Сұлтан операсы сахналанды

Қазақстан Республикасының Президенті Қасым-Жомарт Тоқаевтың Өзбекстанға мемлекеттік сапары аясында Ташкентте «Хан Сұлтан. Алтын Орда» операсы сахналанды.

Абай атындағы Қазақ ұлттық опера және балет театры ұжымы сахналаған тарихи қойылымды көруге Орталық Азияның Мәдениет министрлері мен зиялы қауым өкілдері, сондай-ақ қала тұрғындары келді. «Хан Сұлтан. Алтын Орда» операсы Қазақ Президенті Қасым Жомарт Тоқаевтің Өзбекстанға мемлекеттік сапары аясында ұйымдастырылды. Әлішер Новаи атындағы Өзбекстанның академиялық балет театрының іші абыр-сабыр. Билеттер санаулы күнде сатылып кеткен. Қойылымға 250 өнер иесі, оркестр, хор, балет труппасы және 16 тоннадан астам сахналық декорация мен костюмдер жеткізілді. Аты аңызға айналған театрдың қойылымына қызығушылық өте жоғары. Операны тамашалауға Орталық Азия және Әзербайжанның Мәдениет министрлері келді. Қойылым басталмас бұрын актерлермен кездесіп естелік суретке түсті.

Опера классикалық өнер мен заманауи технологияны біріктіріп, көрерменге ерекше әсер сыйлады. 3D форматтағы графика Алтын орда дәуіріне жетелеп, бір сәт тарих қойнауына апарды. 

Денис Соколов, Ташкент қаласының тұрғыны:

- Өте көремет қойылым болды. Дәл осындай операның Орталық Азияда сахналануына қуаныштымын. Маған орекстрдің өнері, кейбір әртістердің ерекше дауыстары қатты әсер етті. Сондай-ақ этникалық музыканың әуені тамаша болды.

Тамара Чхидзе, Грузин дизайнерлері қауымдастығының өкілі:

- Мен бұл спектакльді екінші мәрте көріп тұрмын. Премьерасын Қазақстанда көріп. керемет әсер алдым. Орталық Азия халықтарының тұтас мәдениетін көрсететін бірегей опера. Ал костюмдер тіпті керемет. Арнайы әзірленіп, әдемі үйлесім тапқан.

Қойылым түркі елдері үшін бөтен емес. Түбі бір халықтардың ортақ тарихы сахналанды. Мұны көзі қарақты көрермен де жақсы түсінеді.

Гуюк Назмединов, өнертанушы ғалым:

- Шынын айтсам өте таң қалып тұрмын. Мұндай болады деп ойламады. Сол дәуірдегі тарихи оқиғаларды әдемі, үйлесімді көрсетті. Авторларға алғыс айтамын. Осы тақырыпты қозғағандары, арнайы эфектілермен жұмыс істеуі, бәрі өзіндік стильді қалыптастырды. 

Бауырлас мемлекеттер арасында мәдени байланыстар жылдан жылға артып келеді. Театрлардың бір-біріне гастрольдік сапарға барып тарихи қойылымдар сахналауы соның бір айғағы.