AMANAT партиясы Абай облыстық филиалының жаңа төрағасы сайланды

Сонымен қатар облыста «Бақты-Аягөз» бағытындағы теміржол құрылысы басталып, Семейде Ертіс өзені арқылы өтетін жаңа көпір салынуда. Мұның бәрі – Мемлекет басшысы Қасым-Жомарт Тоқаевтың тапсырмаларын және тұрғындардың тұрмысын жақсартуға бағытталған «AMANAT» партиясының сайлауалды бағдарламасын кезең-кезеңімен жүйелі жүзеге асырудың нақты нәтижелері.

Бүгін Семей қаласында «AMANAT» партиясы Абай облыстық филиалының кезектен тыс XIII конференциясы өтті. Іс-шара барысында бұған дейін Абай облысы әкімінің орынбасары қызметін атқарған Қанат Әділбай ашық дауыс беру арқылы партияның өңірлік филиалының жаңа төрағасы лауазымына сайланды. «AMANAT» партиясының Хатшысы Ержан Жылқыбаев оған жаңа қызметінде табыс тілеп, оның мол тәжірибесі мен өңірдің тыныс-тіршілігін жіті білуі партия жұмысына тың серпін береріне сенім білдірді.

Партия Хатшысы өз сөзінде Мемлекет басшысы Қасым-Жомарт Тоқаевтың Абай облысын құру туралы шешімі жай ғана әкімшілік қадам емес, тарихи әділдікті қалпына келтіру және өңір тұрғындарының көп жылдан бергі арманын орындау екенін атап өтті. Бұл қадам инфрақұрылым мен әлеуметтік саладан бастап, адами капиталға дейінгі өңір дамуына қуатты серпін берді. Мәселен, үш жылда облыс бюджеті екі есе өсіп, 500 млрд теңгеге жетті.

«AMANAT» партиясы – ел Президентінің саяси тірегі. Осы орайда, партияның сайлауалды бағдарламасы еліміздегі әрбір отбасының тұрмысын жақсартуға және табысын арттыруға бағытталған. Партия халықтың мүддесін қорғап, әлеуметтік әділдік пен Қазақстанның жан-жақты даму қағидаттарын сақтап келеді. Біздің міндетіміз – нақты нәтижелерге қол жеткізе отырып, жергілікті жерлерде Мемлекет басшысының реформаларын адал жүзеге асыру», – деді ол.

Сонымен қатар Ержан Жылқыбаевтың айтуынша, партияның қоғамдық қабылдау бөлмелері билік пен халық арасындағы алтын көпір болып қала береді. Тек осы жылдың өзінде Абай облысының тұрғындарынан 2 мыңнан астам өтініш келіп түсті. Олардың жартысынан көбісі оң шешімін тапты. Бұл – «AMANAT» партиясы тұрғындарды толғандырған мәселелерді шешуге нақты көмек көрсетіп жатқанының жарқын көрінісі. Бұған қоса, Ержан Жылқыбаев партия жұмысы есеппен емес, тұрғындар сезінетін нақты нәтижелермен өлшенуі керек екенін атап өтті. Ол аймақта қатаң бақылауды қажет ететін нысандар бар екенін еске салды. Мәселен, 2023 жылдан бері Жарма ауданы Сұлусары ауылында, сондай-ақ Көкпекті ауданына қарасты бес ауылда сот процесінің ұзаққа созылуына байланысты, сумен жабдықтау құрылысы аяқталмай келеді. Партия Хатшысы атап өткендей, осы мәселені партия жіті қадағалауы керек, ал жергілікті жерлерде нақты әрі жауапты жұмыс жүргізілуге тиіс. Осыған байланысты, Ержан Жылқыбаев партиялық тәртіптің маңызына назар аударды. Биыл жүргізілген ішкі тексеру жұмысының қорытындысы бойынша, немқұрайлы әрі тапсырмаларға формалды түрде қараған 11 мәслихат депутатының мандаты кері қайтарылып, тағы 26 депутатқа сөгіс жарияланды.

Сондай-ақ конференция барысында Шығыс Қазақстан облысы Ішкі саясат басқармасының басшысы Айдар Садырбаев өңірде партиялық жобалар аясында атқарылған жұмыс туралы баяндады. Ол бұған дейін филиал төрағасы қызметін атқарған болатын. Мәселен, 2025 жылы тұрғындардың қаржылық сауатын арттыруға арналған «Қарызсыз қоғам» партиялық жобасы аясында Абай облысының 20 мыңға жуық тұрғыны оқытылды. Сондай-ақ берешекті реттеу мәселесі бойынша нақты көмек көрсетілді. Бұған қоса, өңірде үш жылға жетер-жетпес уақыт аралығында «Жер аманаты» комиссиясы атқарған жұмыс аясында 550 мың гектар ауыл шаруашылығы жері мемлекет меншігіне қайтарылды.

«Партиялық бақылау жұмысы аясында сайлауалды бағдарламаға енгізілген нысандарға 300-ге жуық тексеру жүргізілді. Партиялық бақылау жұмысы пайда болған мәселелерді анықтап қана қоймай, оларды шешуге де мүмкіндік береді. Мәслихат депутаттарының қадағалауымен Водный кентінде 600 орындық, Аягөз ауданында 300 орындық мектептер ашылды. Бұл – партияның сайлауалды уәделерінің орындаулы мен тұрғындар өміріндегі оң өзгерістердің нақты мысалы», – деді ол.

Айта кетейік, бүгінде Абай облысында 30 мыңға жуық адамды біріктіріп отырған 140-қа жуық бастауыш партия ұйымы жұмыс істейді.