AMANAT партиясының қоғамдық қабылдау бөлмесіне 112 мыңнан астам өтініш түсті

Тұрғындар алимент өндіру, жер учаскесіне акт алу, құжат рәсімдеу және жаңа спорт секцияларын ашу секілді бірқатар мәселе бойынша жүгінді.

Астана қаласының тұрғыны Динара Қалдыбекова 10 жылдан астам уақыттан бері кәмелетке толмаған екі баласына алимент өндіре алмай келеді. Сот шешімі шыққанына қарамастан, оның ұзақ уақыт бойы орындалмай отырғанын жеткізді. Бүгінде берешек сомасы шамамен 9 млн теңгені құрайды. Ал жеке сот орындаушы түрлі сылтаумен өтініш иесінен 100 мың теңге көлемінде заңсыз ақша талап етуде.

Ал Жамбыл облыстық қан орталығының директоры Гулам Умаров кәсіподақтар базасында медицина қызметкерлеріне арналған тәулік бойы жұмыс істейтін бірыңғай заңгерлік колл-орталығын ашуды ұсынды. Осы орайда партияның Атқарушы хатшысы Дәулет Кәрібек жуырда «AMANAT» партиясы мен Қазақстан Республикасы Кәсіподақтар федерациясы арасында ынтымақтастық туралы меморандумға қол қойылғанын және оған сәйкес, бұл мәселе ұйым өкілдерімен де жан-жақты талқыланатынын атап өтті.

Сонымен қатар этникалық қазақтарға – басқа елдердің азаматтарына Қазақстанда 10 жыл өмір сүруге және жұмыс істеуге құқық беретін «Ата жолы» картасын иеленген Швейцария азаматы, дәрігер Серік Тұрсын Қазақстанда Ультрадыбыстық зерттеу мектебін ашуға қолдау көрсетуді өтінді. Ал Шығыс Қазақстан облысы Өскемен қаласының тұрғыны Жанна Мустафа сақтандыру компаниялары мен жеке сот орындаушылары залалды өтемей отырғанына шағымданды. Астаналық Гүлзат Мәдібекова жер учаскесіне акт алу, құжат рәсімдеу мәселесімен жүгінді. Ержан Әмірханов Семей қаласында балалар грек-рим күресімен шұғылдана алатын жаңа зал қажет екенін жеткізді. 

Бұл ретте бірқатар өтініш тиісті мемлекеттік органдарға жолданды. Кейбір мәселе бойынша нақты түсіндірме беріліп, құқықтық көмек көрсетілді. 

Осы орайда «AMANAT» партиясының Атқарушы хатшысы Дәулет Кәрібек тұрғындарды толғандырған түйткілдер назардан тыс қалмайтынын және осы қабылдауда көтерілген барлық мәселені жеке қадағалап отыратынын жеткізді.

«Бүгінгі қоғамдық қабылдауға келген азаматтар «AMANAT» партиясының қолдауы мен көмегіне сенім артып, өз өтініш-тілегімен жүгінді. Олар бұған дейін шешімін таппаған, қордаланған мәселелері бойынша бірқатар мекеменің табалдырығын тоздырып үлгерген еді. Партиямыз өз жұмысында осындай азаматтардың жағдайына айрықша мән береді. Себебі біз үшін азаматтардың әл-ауқатын арттыру, тұрмыс сапасын жақсарту және оларды толғандырған мәселелердің нақты шешімін табуына ықпал ету – негізгі басымдықтардың бірі. Партия бұл өтініштердің орындалуын бақылауда ұстайды», – деді Дәулет Кәрібек.

Еске сала кетейік, биыл 11 айда «AMANAT» партиясының қоғамдық қабылдау бөлмелеріне 112,3 мың өтініш келіп түсіп, оның 58%-ы оң шешімін тапты. Қалған мәселелер бойынша түсініктеме берілді. Сондай-ақ шалғай елді мекендерде 2 146 мобильді қоғамдық қабылдау өткізіліп, 2 440 ауыл қамтылды. Нәтижесінде, тұрғындардан 15,7 мың өтініш қабылданып, оның 48%-ы оң шешімін тапса, 49%-ы бойынша түсінікте берілді. Қалған 3%-ы бойынша жұмыс жүргізіліп жатыр.