Ақ үй маңында жексенбіге қараған түні атыс болды

АСТАНА, 24 мамыр – Sputnik. АҚШ президенті Дональд Трамп әкімшілігі маңында атыс болды, деп хабарлады америкалық БАҚ.

Fox News хабарлауынша, қолында тапаншасы бар ер адам Ақ үй жанындағы бақылау-өткізу пунктіне келіп, қауіпсіздік қызметкерлеріне оқ жаудырған. АҚШ құпия қызметі қарулы адамды залалсыздандырды. Кейін ол ауруханада көз жұмды.

Атыс кезінде сол маңда жүрген бір адам жараланған. Оқиға кезінде Дональд Трамп резиденцияда болған.

Күдікті - Мэриленд штатынан шыққан 21 жастағы Насир Бест. БАҚ-тың хабарлауынша, оның психикалық денсаулығында ауытқулар болған. 2025 жылы екі рет ұсталғаны белгілі болды. Бірінші рет ол Ақ үйге кіретін жолды жауып тастаса, екінші рет резиденцияның кіреберіс жолына кірмек болған. Сондай-ақ өзін құдай деп атағаннан кейін оның психикалық жағдайын тексеруге де жіберген. Екінші жағдайдан кейін сот Бестке Ақ үйге жолауға тыйым салды.

Бұл соңғы айларда Трамп әкімшілігі маңайында болған төртінші осындай оқиға.