Ақмола облысында аудандық аурухана жаңғыртылды

Атбасар қаласындағы аудандық көпбейінді аурухана ғимараты күрделі жөндеуден өтті.  

Жаңғырту жұмыстарына бюджеттен 1 млрд. теңгеден астам қаржы бөлінді.  Енді медициналық мекеме ұжымы  жергілікті тұрғындармен қатар, көршілес 5 ауданның халқына қызмет көрсетеді.

Аурухананы жөндеу жұмыстары былтыр басталды. Бір жылда ғимараттың қасбеті жаңартылып, ескі жабдықтары толығымен ауыстырылды. Енді аудан дәрігерлері кейбір күрделі операцияны жергілікті жерде жасай алады.

Несібелі Итжанова, қала тұрғыны:

- Бұрын ауырып қалғанда әртүрлі аурумен бірден Көкшетауға, Астанаға жіберетін. Қазір ондай жоқ. Қазір бәрі осында. Осы ауруханада анализін алады, кардиограмасын жасайды, системасын қояды. Бәрін осы жерде істейді.

Исатай Мәженов, нейрохирург:

- Иә, техникалық инструменттің барлығы бар. Жақында осы ангиограф дайындап, іске қосамыз. Онымен инсульт, инфракт сияқты ауруларды емдейміз.

Биыл емдеу мекемесі «ауданаралық аурухана» мәртебесін алды.  Ауданның 43 мың тұрғынымен қоса,  жақын маңдағы 5 ауданның 100 мыңға жуық халқына қызмет көрсетеді.

Самат Исламов, Ауданаралық көпбейінді аурухананың бас дәрігері:

- Қазір балаларды емдеу бөлімі де жаңартылып жатыр. Оған облыстық қазынадан 540 млн теңге бөлінді. Негізі аурухана 155 орынға есептелген. Алдағы уақытта балалар бөлімін қоссақ,  210 орынға дейін кеңейтіледі.

Жалпы өңірде «ауылда денсаулық сақтауды жаңғырту» ұлттық жобасы аясында 38 медициналық мекеменің құрылысы жүріп жатыр.  Қазір соның 34-і пайдалануға берілді. Қалғаны жыл соңына дейін тапсырылады.

Авторлары: Абзал Азаматұлы, Виктор Полянный