​Ақмола облысында мәслихат төрағасының үйін тонаған бұрын сотталған үш адамға үкім шықты

Астрахан аудандық сотында П., Е. және Ш.-ға қатысты алдын ала сөз байласу арқылы адамдар тобымен тұрғын үйге заңсыз кіріп, ірі мөлшерде тонау жасағаны және автокөлікті заңсыз айдап әкеткені үшін қылмыстық іс қаралды. 

Сот анықтағандай, 2025 жылдың шілдесінде Тараз қаласының тұрғындары П. мен Ш., сондай-ақ Шымкент қаласының тұрғыны Е. ауыл тұрғыны М.-ның ақшалай қаражаты мен мүлкі бар деп болжап, Астраханка ауылына келген. Түнгі уақытта олар беттерін жасыратын маскалар киіп, құрамында хлоры бар зат шашатын құралмен қаруланып, үйге заңсыз кірген. Үйде төрт ересек адам және 3 жасар бала болған.

П. мен Е. жәбірленушілер М. мен С.-ға күш қолданып, ақша мен құнды заттарды талап еткен. Ақша мен зергерлік бұйымдарды алып, барлық жәбірленушілерді кәмелетке толмаған баламен бірге жертөлеге қамап, кейін үйде болған іздерін жойған.

Үйден шыққан соң П. мен Е. ауладағы автокөлікті иемденіп, өздерін автокөлікте күтіп отырған Ш.-ға жету мақсатында айдап әкеткен. Одан әрі олар Астанаға, кейін Тараз қаласына қайтып, ұрланған мүлікті өз қалауларынша пайдаланған.

П., Е. және Ш.-ның қылмыстық әрекеттерімен жәбірленушілерге 4,2 млн. теңге материалдық залал келтірілді. Сонымен қатар, П. мен Е. автокөлікті заңсыз айдап әкету қылмысын жасаған.

Сот үкімімен П. (28.11.2016 жылғы үкім бойынша өтелмеген жазаның бөлігін қосумен) қылмыстық-атқару жүйесінің қауіпсіздігі барынша жоғары мекемесінде өтеумен 8 жыл 6 айға бас бостандығынан айырылды. Е. (22.07.2013 жылғы үкім бойынша өтелмеген жазаның бөлігін қосумен) қауіпсіздігі барынша жоғары мекемесінде өтеумен 8 жыл 6 айға бас бостандығынан айырылды. Ш.-ға орташа қауіпсіз мекемесінде өтеумен 5 жылға бас бостандығынан айыру тағайындалды. П. мен Е.-нің әрекеттерінде қылмыстың қайталану қауіпі танылды.

Сотталғандардан жәбірленушілердің пайдасына 4,2 млн.теңге материалдық залал, екі жәбірленушінің әрқайсысының пайдасына 2 млн.теңгеден моральдық зиян солидарлық тәртіппен өндірілді.

Сонымен қатар, сот Жамбыл және Түркістан облыстары полиция департаменттерінің атына жеке қаулылар шығарып, шартты түрде мерзімінен бұрын босатылған П. мен Е.-ге қатысты тиісті бақылаудың болмауына жол берген уәкілетті полиция қызметкерлеріне шара қабылдауды тапсырды.

Сот актілері заңды күшіне енген жоқ.

Бүгін, 17:25